കണ്ണൂര് : മദ്യപിച്ച് സഹയാത്രികരോട് മോശമായി പെരുമാറിയ ട്രെയിന് യാത്രക്കാരനെ ശാരീരികമായി കൈകാര്യം ചെയ്ത എ.എസ്.ഐയുടെ രീതി തെറ്റെന്ന് കണ്ണൂര് പോലീസ് മേധാവി മനുഷ്യാവകാശ കമീഷനെ അറിയിച്ചു. എന്നാല്, പോലീസുകാരുടെ ഉദ്ദേശശുദ്ധിയില് തെറ്റില്ലെന്നും ഇയാളെ ട്രെയിനില്നിന്നും പുറത്താക്കിയ നടപടി നിയമപരമാണെന്നും റിപ്പോര്ട്ടില് പറയുന്നു. ജനുവരി മൂന്നിനായിരുന്നു സംഭവം. കണ്ണൂര് എക്സ്പ്രസില് യാത്രചെയ്തയാളെ എ.എസ്.ഐ ശാരീരികമായി കൈകാര്യം ചെയ്യുന്ന ദൃശ്യങ്ങള് വാര്ത്തചാനലുകള് സംപ്രേഷണം ചെയ്തതതിന്റെ അടിസ്ഥാനത്തില് കമീഷന് ജുഡീഷ്യല് അംഗം കെ.ബൈജുനാഥ് സ്വമേധയ രജിസ്റ്റര് ചെയ്ത കേസിലാണ് നടപടി. റിപ്പോര്ട്ടിന്റെ അടിസ്ഥാനത്തില് കമീഷന് കേസ് തീര്പ്പാക്കി.
