തിരൂരങ്ങാടി: പിഴ ഈടാക്കുന്നതിനുള്ള രസീത് ബുക്കില് കൃത്രിമം കാണിച്ച തിരൂരങ്ങാടി എസ്.ഐക്ക് സസ്പെന്ഷന്. സബ് ഇന്സ്പെക്ടര് ബിബിനെയാണ് ജില്ല പോലീസ് മേധാവി എസ്. സുജിത്ത് ദാസ് അന്വേഷണ വിധേയമായി സസ്പെന്ഡ് ചെയ്തത്.
പോലീസ് വാഹന പരിശോധനയിലും മറ്റുമായി പിഴ ഈടാക്കുമ്പോള് ഉപയോഗിക്കുന്ന രസീത് ബുക്കിലാണ് എസ്.ഐ കൃത്രിമം കാണിച്ചത്. പിഴ അടക്കുന്നയാള്ക്ക് അയാള് നല്കിയ തുകയുടെ യഥാര്ഥ രസീത് നല്കും. പിന്നീട് ബുക്കില് തുക കുറച്ച് കാണിക്കുകയായിരുന്നു. ഫെബ്രുവരി എട്ടു മുതലുള്ള എല്ലാ പിഴയുടെയും രസീതില് കൃത്രിമം നടന്നതായി കണ്ടെത്തി.
ഇതുസംബന്ധിച്ച പരാതിയുടെ അടിസ്ഥാനത്തില് ജില്ല പോലീസ് മേധാവി എസ്. സുജിത്ത് ദാസ്, മലപ്പുറം ഡിവൈ.എസ്.പി സുദര്ശനെ വകുപ്പുതല അന്വേഷണ ചുമതല ഏല്പ്പിച്ചിരുന്നു. ഡിവൈ.എസ്.പിയുടെ റിപ്പോര്ട്ടിന്റെ അടിസ്ഥാനത്തിലാണ് നടപടി. തെരഞ്ഞെടുപ്പിന് മുന്നോടിയായി പോലീസ് ഉദ്യോഗസ്ഥരെ സ്ഥലം മാറ്റുന്നതിന്റെ ഭാഗമായാണ് തിരൂരങ്ങാടി എസ്.ഐയായി ബിബിന് ഫെബ്രുവരി എട്ടിന് ചുമതലയേറ്റത്. അന്നുമുതല് രസീതിയില് കൃത്രിമം നടന്നിട്ടുണ്ട്. പിഴ തുക പിറ്റേദിവസം ബാങ്കില് നിക്ഷേപിക്കുകയാണ് പതിവ്.
