ന്യൂഡല്ഹി: ഐഎസ്ആര്ഒ ചാരക്കേസുമായി ബന്ധപ്പെട്ട ഗൂഢാലോചന കേസില് മുന് ഡിജിപി സിബി മാത്യൂസിന്റെ മുന്കൂര് ജാമ്യം റദ്ദാക്കണമെന്ന സിബിഐയുടെ ഹര്ജി പരിഗണിക്കുന്നത് സുപ്രീംകോടതി 27ലേക്കു മാറ്റി. ജസ്റ്റീസ് എ.എം. ഖാന്വില്ക്കര് അധ്യക്ഷനായ ബെഞ്ചിന്റെതാണ് നടപടി. ചാരക്കേസില് ശാസ്ത്രജ്ഞന് നമ്പി നാരായണനെ കുരുക്കാന് ഗൂഢാലോചന നടന്നുവെന്ന കേസിലാണ് സിബിഐയുടെ ഹര്ജി.
സിബി മാത്യൂസിന്റെ മുന്കൂര് ജാമ്യത്തിന് തിരുവനന്തപുരം സെഷന്സ് കോടതി സമയപരിധി വച്ചിരുന്നു. എന്നാല് ഈ നടപടി ഹൈക്കോടതി റദ്ദാക്കി. ഇതിനെതിരേയാണ് സിബിഐ സുപ്രീംകോടതിയെ സമീപിച്ചത്. കേരള പോലീസിലെ ഉദ്യോഗസ്ഥരായിരുന്ന എസ്.വിജയന്, തമ്പി എസ്. ദുര്ഗാദത്ത്, മുന് ഐബി ഡെപ്യൂട്ടി ഡയറക്ടര് ആര്.ബി. ശ്രീകുമാര്, റിട്ടയേര്ഡ് ഐബി ഉദ്യോഗസ്ഥന് പി.എസ്. ജയപ്രകാശ് എന്നിവരുടെ മുന്കൂര് ജാമ്യം റദ്ദാക്കണമെന്ന സിബിഐയുടെ ഹര്ജി സുപ്രീംകോടതിയുടെ പരിഗണനയിലുണ്ട്.
