കൊച്ചി : സീറോ മലബാര് സഭാ ഭൂമിയിടപാട് കേസില് ഹൈക്കോടതി ഉത്തരവിനെതിരെ കര്ദിനാള് മാര് ജോര്ജ് ആലഞ്ചേരി നല്കിയ ഹര്ജി ഉള്പ്പെടെ വിവിധ ഹര്ജികള് സുപ്രീം കോടതി ഇന്ന് പരിഗണിക്കും.പള്ളികളുടെ ഭൂമിയും സ്വത്തുക്കളും വില്ക്കാന് ബിഷപ്പുമാര്ക്ക് അവകാശമില്ലെന്ന കേരള ഹൈക്കോടതി വിധിയിലെ പരാമര്ശങ്ങള്ക്കെതിരെ സീറോ മലബാര് സഭയുടെ താമരശ്ശേരി രൂപത നല്കിയ ഹര്ജിയും സുപ്രീം കോടതി ഇന്ന് പരിഗണിക്കും. സീറോ മലങ്കര സഭയുടെ ബത്തേരി രൂപത സമര്പ്പിച്ച ഹര്ജിക്കൊപ്പം താമരശ്ശേരി രൂപത സമര്പ്പിച്ച ഹര്ജിയും സുപ്രീം കോടതി ഇന്ന് പരിഗണിക്കും.
ബത്തേരി രൂപതയുടെ ഹര്ജിയില് നോട്ടീസ് അയച്ചതിനാല് താമരശ്ശേരി രൂപതയുടെ ഹര്ജിയില് സുപ്രീം കോടതി പ്രത്യേക നോട്ടീസ് അയച്ചിരുന്നില്ല. ജസ്റ്റിസുമാരായ ദിനേശ് മഹേശ്വരി, അനിരുദ്ധ ബോസ് എന്നിവരടങ്ങിയ ബെഞ്ചാണ് കേസ് പരിഗണിക്കുക. സംസ്ഥാന സര്ക്കാരും കര്ദിനാള് മാര് ജോര്ജ് ആലഞ്ചേരിയും ഉള്പ്പെടുന്നതാണ് എതിര് കക്ഷികള്.
സിറോ മലബാര് സഭയുടെ എറണാകുളം – അങ്കമാലി അതിരൂപതയുടെ ഭൂമി വില്പനയില് ക്രമക്കേട് ആരോപിച്ചുള്ള കേസ് റദ്ദാക്കാനാകില്ലെന്ന വിധിയിലാണ് പള്ളികളുടെ ഭൂമിയും ആസ്തിയും വില്ക്കുന്നതിന് ബിഷപ്പുമാര്ക്ക് അധികാരമില്ലെന്ന് കേരള ഹൈക്കോടതി വ്യക്തമാക്കിയത്. കര്ദിനാള് മാര് ജോര്ജ് ആലഞ്ചേരി വിചാരണ നേരിടണമെന്ന ഹൈക്കോടതി ഉത്തരവിനെതിരെയാണ് രൂപതകള് സുപ്രീം കോടതിയെ സമീപിച്ചത്. സീറോ മലബാര് സഭയുമായി ബന്ധപ്പെട്ട കേസിലെ വിധി എല്ലാ ക്രിസ്ത്യന് സഭകളെയും ബാധിക്കുമെന്ന് ബത്തേരി, താമരശ്ശേരി രൂപതകള് വാദിച്ചു.
