ന്യൂഡല്ഹി : ബിജെപി ഭരണം അവസാനിപ്പിക്കേണ്ടത് രാജ്യഭാവിക്ക് അത്യന്താപേക്ഷിതമെന്ന് സി.പി.ഐ.എം. ജനറല് സെക്രട്ടറി സീതാറാം യെച്ചൂരി. സംഘപരിവാര് രാഷ്ട്രീയം വെറുപ്പിന്റെയും ഹിംസയുടെയും രാഷ്ട്രീയമാണ്. രാജ്യത്തെ മതാടിസ്ഥാനത്തില് ഭിന്നിപ്പിച്ച് ഭരിക്കുകയാണ് ലക്ഷ്യം. ബി.ജെ.പിയുടെ വര്ഗീയഭരണം അവസാനിപ്പിക്കുകയെന്നത് രാജ്യസ്നേഹികളായ എല്ലാവരും ഒരേ മനസോടെ ഏറ്റെടുക്കേണ്ട കടമയെന്നും യെച്ചൂരി പറഞ്ഞു.
ബി.ജെ.പി. ഭരണത്തില് കോര്പറേറ്റുകള് മാത്രമാണ് കൊഴുക്കുന്നത്. നരേന്ദ്ര മോദി ഭരണത്തില് രാജ്യത്തെ സമ്പന്നര് കൂടുതല് സമ്പന്നരാകുകയും ദരിദ്രര് കൂടുതല് ദരിദ്രരാകുകയും ചെയ്യുന്ന അസ്വാഭാവിക സാഹചര്യമാണ്. വിലക്കയറ്റവും തൊഴിലില്ലായ്മയും അടക്കമുള്ള ദുരിതങ്ങളില് സാധാരണക്കാര് നട്ടംതിരിയുകയാണ്. ജനകീയ പ്രശ്നങ്ങള്ക്കൊന്നും സര്ക്കാരിന് പരിഹാരമില്ല.
രാജ്യത്തെ പൊതുമേഖലാ സ്ഥാപനങ്ങള് ഒന്നൊന്നായി വിറ്റഴിക്കുകയാണ്. പൊതുമേഖലയെന്നത് രാജ്യത്തിന്റെ സ്വത്താണ്. ജനങ്ങളാണ് ഉടമകള്. അവരുടെ അനുമതിയില്ലാതെയാണ് മേല്നോട്ടക്കാരന് മാത്രമായ കേന്ദ്ര സര്ക്കാര് പൊതുമേഖല അപ്പാടെ വിറ്റഴിക്കുന്നു. എന്നാല് പൊതുസ്വത്ത് കൊള്ളയടിക്കുന്ന ഈ മേല്നോട്ടക്കാരനെ 2024-ല് നീക്കണമെന്നും യെച്ചൂരി ആവശ്യപ്പെട്ടു.
