പൂനെ: പീപ്പിള്സ് പാര്ട്ടി നേതാവ് മെഹബൂബ മുഫ്ത്തിക്കെതിരേ ആഞ്ഞടിച്ച് ശിവസേനാ നേതാവ് സഞ്ജയ് റാവത്ത്. ചൈനയുടെ സഹായത്തോടെ കശ്മീരില് അനുച്ഛേദം 370 പുനഃസ്ഥാപിക്കാന് ശ്രമിക്കുന്നവരെ ആന്തമാനിലേക്കയച്ച് പത്ത് വര്ഷം തടവിലടണമെന്നാണ് റാവത്ത് ആവശ്യപ്പെട്ടത്.
മെഹബൂബ മുഫ്ത്തിയോ ഫാറൂഖ് അബ്ദുല്ലയോ ആരുമാവട്ടെ ചൈനയുടെ സഹായത്തോടെ ഇന്ത്യന് ഭരണഘടനയെ തകര്ക്കാന് ശ്രമിക്കുന്നവരെ വെറുതെ വിടില്ല. അവരെ അറസ്റ്റ് ചെയ്ത് ആന്തമാനില് പത്ത് വര്ഷം തടവിലിടും. അവരെന്താണ് ഇപ്പോഴും സ്വതന്ത്രരായി നടക്കുന്നത്- റാവത്ത് ചോദിച്ചു.
കശ്മീരിന് പ്രത്യേക അധികാരം നല്കുന്ന അനുച്ഛേദം 370 പുനസ്ഥാപിക്കാന് ചൈനയുടെ സഹായം തേടുന്ന മെഹബൂബ മുഫ്ത്തിക്കും ഫാറൂഖ് അബ്ദുല്ലയുടെയും പേരില് കേന്ദ്ര സര്ക്കാര് കേസെടുക്കണമെന്ന് റാവത്ത് നേരത്തെ ആവശ്യപ്പെട്ടിരുന്നു. കശ്മീരിന്റെ പ്രത്യേക അധികാരം പുനഃസ്ഥാപിക്കണമെന്നാവശ്യപ്പെട്ട് സംസ്ഥാനത്ത് രൂപം കൊണ്ട പീപ്പിള്സ് അലിയന്സ് ഫോര് ദി ഗുപ്കര് ഡിക്ലറേഷന് അംഗങ്ങള് കാര്ഗിള് ഡെമോക്രാറ്റിക് അലയന്സ് നേതാക്കളെ കഴിഞ്ഞ ദിവസം കണ്ടതാണ് ശിവസേനാ നേതാവിനെ ചൊടിപ്പിച്ചതെന്ന് കരുതുന്നു. ഒമര് അബ്ദുല്ല, ഗുലാം നബി ലോന് ഹന്ജൗറ, നസീര് അസ്ലം വാനി തുടങ്ങിയവാരണ് പ്രതിനിധിസംഘത്തിലുണ്ടായിരുന്നത്. പീപ്പിള്സ് അലയന്സ് ഫോര് ദി ഗുപ്കര് ഡിക്ലറേഷന്റെ പ്രസിഡന്റ് ഫാറൂഖ് അബ്ദുല്ലയും വൈസ് പ്രസിഡന്റ് മെഹബൂബ മുഫ്ത്തിയുമാണ്.