സുല്ത്താന്ബത്തേരി : ബത്തേരി ഗവ.താലൂക്ക് ആശുപത്രിയില് രോഗിക്ക് കൂട്ടിരിക്കാനെത്തിയ ബന്ധുവിനെ പാമ്പ് കടിച്ചു. പഴേരി വീട്ടിക്കുറ്റി കോളനിയിലെ ശശി (47)ക്കാണ് പാമ്പുകടിയേറ്റത്. വ്യാഴാഴ്ച പുലര്ച്ചെ രണ്ട് മണിയോടെ ഫെയര്ലാന്ഡിലെ പുതിയ ആശുപത്രി ബ്ലോക്കിലാണ് സംഭവം. ബുധനാഴ്ച വൈകുന്നേരം താലൂക്ക് ആശുപത്രിയില് അഡ്മിറ്റ് ചെയ്ത ഇളയച്ഛന് അച്യുതന് കൂട്ടിരിക്കാനെത്തിയതായിരുന്നു ശശി. രാത്രി ആശുപത്രിയുടെ വരാന്തയില് വന്നിരിക്കുന്നതിനിടെ മയങ്ങിപ്പോയി. വേദന തോന്നി, ഞെട്ടിയുണര്ന്നപ്പോള് ഇടതുകാലിലെ ചെറുവിരലില്നിന്ന് രക്തം ഒലിക്കുന്നുണ്ടായിരുന്നു.
