റാന്നി : പോറ്റിയെ കേറ്റിയെ….പാട്ടിനെതിരെ പോലീസില് പരാതി നല്കിയ തിരുവാഭരണ പാത സംരക്ഷണ സമിതി പ്രസിഡന്റ് പ്രസാദ് കുഴിക്കാലക്കെതിരെ രൂക്ഷ വിമര്ശനവുമായി സോഷ്യല് മീഡിയ. ശബരിമലയിലെ സ്വര്ണ്ണകൊള്ളയുമായി ബന്ധപ്പെടുത്തി എഴുതിയുണ്ടാക്കിയ ഈ പാരഡി ഗാനം കഴിഞ്ഞ തെരഞ്ഞെടുപ്പില് വന് ചലനങ്ങളാണ് ഉണ്ടാക്കിയത്. തെരഞ്ഞെടുപ്പു പ്രചാരണത്തിനും ഈ പാട്ട് വ്യാപകമായി ഉപയോഗിച്ചു. കൊച്ചു കുട്ടികളുടെ നാവില്പ്പോലും ഈ പാരഡി ഗാനമാണ് ഇന്നുള്ളത്.
പാട്ട് പുറത്തിറങ്ങിയിട്ട് ഒരു മാസത്തിലേറെയായെങ്കിലും തെരഞ്ഞെടുപ്പില് ഇടതുപക്ഷത്തിന് കനത്ത പരാജയം സമ്മാനിച്ചതോടെയാണ് ഇതിനെതിരെ പരാതി ഉയര്ന്നത്. ഇന്ന് ഉച്ചക്ക് 2.25 ന് ഇ മെയില് മുഖേനയാണ് പ്രസാദ് കുഴിക്കാല ഡി.ജി.പി ക്ക് പരാതി നല്കിയത്. തുടര്ന്ന് മാധ്യമങ്ങള് ഇത് വാര്ത്തയാക്കുകയായിരുന്നു. ഇതോടെ പരാതി നല്കിയ പ്രസാദ് കുഴിക്കാലക്കെതിരെ രൂക്ഷ വിമര്ശനമാണ് സോഷ്യല് മീഡിയയിലെമ്പാടും ഉയരുന്നത്.
ഭഗവാന്റെ സ്വര്ണ്ണം കട്ടപ്പോഴും ശബരിമലയില് അമ്മിണിമാരെ കയറ്റിയപ്പോഴും ഇല്ലാത്ത വിഷമം ഒരു പാരഡി ഗാനത്തിനെതിരെ ഇപ്പോള് ഇയാള് ഉയര്ത്തുന്നത് എന്തിനാണെന്നും ജനങ്ങള് ചോദിക്കുന്നു. തിരുവാഭരണ പാത സംരക്ഷണ സമിതി പ്രസിഡന്റ് ആയിരിക്കുവാന് ഇയാള്ക്ക് യോഗ്യതയില്ലെന്നും ഇടതുപക്ഷത്തിന്റെ മുഖം രക്ഷിക്കുവാനാണ് ഇദ്ദേഹം ഇപ്പോള് പരാതിയുമായി രംഗപ്രവേശം ചെയ്തതെന്നും പറയുന്നു. ഒരു മുന് എം.എല്.എയുടെ നിര്ദ്ദേശപ്രകാരമാണ് ഈ നടപടിയെന്നും പ്രസാദ് കുഴിക്കാല തിരുവാഭരണ പാത സംരക്ഷണ സമിതി ഭാരവാഹി അല്ലെന്നും ആരോപണമുണ്ട്.
