ഡല്ഹി: പ്രധാനമന്ത്രി നരേന്ദ്ര മോദിയുടെ അക്കാദമിക് യോഗ്യതയെക്കുറിച്ചുള്ള ചര്ച്ചകള്ക്കിടയില് ഡല്ഹി മുഖ്യമന്ത്രി അരവിന്ദ് കേജ്രിവാളിനെ പരിഹസിച്ച് ഡല്ഹി ലെഫ്റ്റനന്റ് ഗവര്ണര് വി.കെ. സക്സേന. ഐ.ഐ.ടി ബിരുദം നേടിയിട്ടും ചിലര് വിവേകശൂന്യരായി തുടരുകയാണെന്ന് കേജ്രിവാളിനെ പരോക്ഷമായി വിമര്ശിച്ചുകൊണ്ട് സക്സേന പറഞ്ഞു. ഒരു ബിരുദമുള്ളത് ആരും പൊങ്ങച്ചമായി കാണരുതെന്നും വിദ്യാഭ്യാസം നേടി എന്നു വ്യക്തമാക്കുന്ന ഒരു സര്ട്ടിഫിക്കറ്റ് മാത്രമാണിതെന്നും സക്സേന പറഞ്ഞു.
അതേസമയം ഡിഗ്രി ദിഖാവോ’ ക്യാമ്പയിനുമായി ആം ആദ്മി പാര്ട്ടി രംഗത്തെത്തി. എഎപി നേതാവ് അതിഷിയാണ് പ്രചാരണം ആരംഭിച്ചത്. ബി.ജെ.പി നേതാക്കള് ഉള്പ്പെടെയുള്ള രാഷ്ട്രീയ നേതാക്കള് ബിരുദ സര്ട്ടിഫിക്കറ്റുകള് പ്രദര്ശിപ്പിക്കുകയും വിദ്യാഭ്യാസ യോഗ്യത തെളിയിക്കുകയും വേണമെന്നാണ് പ്രഖ്യാപനം. പ്രധാനമന്ത്രി നരേന്ദ്ര മോദി ബിരുദം നേടിയെന്ന് പറയപ്പെടുന്ന ഗുജറാത്ത് സര്വകലാശാലയില് നിന്ന് ബിരുദ സര്ട്ടിഫിക്കറ്റ് ഹാജരാക്കാന് കഴിയാത്തതിനെയും അതിഷി വിമര്ശിച്ചു.
