ബെംഗളൂരു: വയോധികരായ അച്ഛനമ്മാരെ കൊലപ്പെടുത്തിയ യുവാവ് ഒളിവില്. ബെംഗളൂരുവിലെ കൊടിഗെഹള്ളിയിലാണ് സംഭവം. തിങ്കളാഴ്ച രാത്രി നടന്ന സംഭവത്തിനു പിന്നാലെ യുവാവ് വീട് പുറത്തുനിന്ന് പൂട്ടിയിട്ടാണ് ഒളിവില് പോയതെന്ന് നോര്ത്ത് ഈസ്റ്റ് ബെംഗളൂരു ഡിസിപി ബി.എം. ലക്ഷ്മി പ്രസാദ് പറഞ്ഞു. അച്ഛനമ്മരായ ഭാസ്കര് (61), ശാന്ത (60) എന്നിവരാണ് കൊല്ലപ്പെട്ടത്. ഇവരുടെ മകനായ ശരത് (27) ഒളിവിലാണെന്നും ഇയാളെ കണ്ടെത്താനായുള്ള ശ്രമം തുടരുകയാണെന്നും പോലീസ് അറിയിച്ചു.
മൂര്ച്ചയില്ലാത്ത ആയുധംകൊണ്ട് തലയ്ക്ക് അടിച്ചാണ് ഇവരെ കൊലപ്പെടുത്തിയത്. തിങ്കളാഴ്ച രാത്രി ഇവരുടെ വീട്ടില്നിന്ന് നിലവിളി കേട്ടിരുന്നെങ്കിലും സ്ഥിരമായി നടക്കുന്ന വഴക്കാണെന്ന ധാരണയില് അയല്ക്കാര് പുറത്തിറങ്ങിയില്ല. തുടര്ച്ചയായി വിളിച്ചിട്ടും ഫോണ് എടുക്കാത്തതില് സംശയം തോന്നിയ ശരത്തിന്റെ ജ്യേഷ്ഠന് സജിത്ത് വീട്ടിലേക്ക് വരികയും പൂട്ട് തകര്ത്ത് അകത്തു കടക്കുകയും ചെയ്തു. ഇരുവരുടെയും മരണവിവരം പോലീസിനെ അറിയിച്ചത് സജിത്താണ്.
