പത്തനംതിട്ട : ശബരിമല സ്പെഷൽ സർവീസ് നടത്താനുള്ള തയാറെടുപ്പില് കെഎസ്ആർടിസി. പമ്പ ഡിപ്പോ 14ന് പ്രവർത്തനം ആരംഭിക്കും. സ്പെഷൽ ഡ്യൂട്ടിക്ക് എത്തുന്ന ജീവനക്കാർക്കായി ചെങ്ങന്നൂർ, പത്തനംതിട്ട എന്നിവിടങ്ങളിൽ നിന്ന് 14 മുതൽ പമ്പക്ക് സ്പെഷൽ സർവീസ് നടത്തും.
പമ്പ-നിലയ്ക്കൽ ചെയിൻ സർവീസിന് 200, ദീർഘദൂര സർവീസിന് 300 ബസുകളാണ് ക്രമീകരിക്കുന്നത്. 120 നോൺ എസി, 50 എസി, 30 ഫാസ്റ്റ് ബസ്സുകളുമാണ് ചെയിൻ സർവീസിന് ഒരുക്കുന്നത്. ചെയിൻ സർവീസിനു ലോഫ്ലോർ ബസുകളാണ് കൂടുതൽ. തിരുവനന്തപുരം സെൻട്രൽ വർക്ഷോപ്പിൽ 60, ആലുവ, മാവേലിക്കര എന്നീ റീജനൽ വർക്ഷോപ്പുകളിൽ 80 ബസുകളുടെ അറ്റകുറ്റപ്പണികൾ കഴിഞ്ഞു. ഇവ 16ന് പമ്പയിൽ എത്തിക്കും.
പമ്പയ്ക്കുള്ള പ്രധാന ദീർഘദൂര സർവീസ് ചെങ്ങന്നൂർ, കോട്ടയം പത്തനംതിട്ട, എരുമേലി, കൊട്ടാരക്കര, കുമളി, എറണാകുളം, തിരുവനന്തപുരം. കായംകുളം എന്നീ ഡിപ്പോകളിൽ നിന്നാണ്. ഇതിനായി ചെങ്ങന്നൂർ 50, കോട്ടയം 30, പത്തനംതിട്ട 10, എറണാകുളം 15,കുമളി 10, എരുമേലി 7, തിരുവനന്തപുരം 5,കൊട്ടാരക്കര 6, കായംകുളം 2 ബസുകൾ നൽകും. ഇതിൽ എറണാകുളം ഒഴികെ എല്ലാ ഡിപ്പോയ്ക്കും ഫാസ്റ്റ് ബസുകളാണ് നൽകുന്നത്. എറണാകുളത്ത് 8 സൂപ്പർ ഫാസ്റ്റ്, 2 ഡീലക്സ്, 5 ഫാസ്റ്റ് ബസുകളാണ് നൽകുന്നത്.
