പത്തനംതിട്ട : സെപ്റ്റംബർ 10 ന് 166 മത് ശ്രീനാരായണ ജയന്തി ആഘോഷം പത്തനംതിട്ടയിൽ വിപുലമായി ആഘോഷിക്കാൻ യൂണിയനിലെ ശാഖാ സെക്രട്ടറിമാരുടെ സംയുക്ത കോൺഫ്രൻസിൽ തീരുമാനിച്ചു. ജയന്തി ആഘോഷത്തിന് മുന്നോടിയായി തേക്കുതോട് സെൻട്രൽ, കോന്നി, വാഴമുട്ടം, മലയാലപ്പുഴ, പത്തനംതിട്ട യുണിയൻ ഓഡിറ്റോറിയം എന്നിവിടങ്ങളിൽ മേഖല സമ്മേളനങ്ങൾ നടക്കും. ജയന്തി ആഘോഷത്തോടനുബന്ധിച്ചു പത്തനംതിട്ട നഗരത്തിൽ ഘോഷയാത്രയും ജയന്തി സമ്മേളനവും നടക്കും.
ശാഖകളിലെ ഭവന രഹിതർക്ക് നിർമ്മിച്ചു നൽകുന്ന വീടുകളുടെ താക്കോൽ ദാനവും വിദ്യാർഥികൾക്കുള്ള വിദ്യാഭ്യാസ അവാർഡുകളുടെ വിതരണവും സമ്മേളനത്തിൽ നടക്കും. യൂണിയൻ സെക്രട്ടറിമാരുടെ സംയുക്ത കോൺഫ്രൻസിൽ യുണിയൻ പ്രസിഡണ്ട് കെ.പത്മകുമാർ അധ്യക്ഷത വഹിച്ചു. സെക്രട്ടറി ഡി.അനിൽകുമാർ, വൈസ് പ്രസിഡണ്ട് സുനിൽ മംഗലത്ത് , യോഗം അസിസ്റ്റന്റ് സെക്രട്ടറി ടി.പി.സുന്ദരേശൻ, യോഗം ഡയറക്ടർ ബോർഡ് അംഗം സി.എൻ.വിക്രമൻ, യുണിയൻ കൗൺസിൽ അംഗങ്ങളായ എസ്.സജിനാഥ്, പി.കെ. പ്രസന്നകുമാർ, പി.വി. രണേഷ്, കെ.എസ്.സുരേശൻ, പി.സലിംകുമാർ, ജി.സോമനാഥൻ യുണിയൻ മൈക്രോ ഫൈനാൻസ് കോ ഓർഡിനേറ്റർ കെ.ആർ. സലീലനാഥ് എന്നിവർ പങ്കെടുത്തു.
