തൃശൂര്‍ : എസ്.എസ്.എല്‍.സി പരീക്ഷയില്‍ ജില്ലക്ക് ഇക്കുറിയും റെക്കോഡ് വിജയം. 99.33 ശതമാനമാണ് വിജയം. കഴിഞ്ഞ വര്‍ഷത്തെ അപേക്ഷിച്ച്‌ വിജയം 0.02 ശതമാനം കൂടി. സംസ്ഥാനതലത്തില്‍ മികച്ച പ്രകടനം കാഴ്ചവെക്കാനുമായി. 2020ല്‍ ഒമ്പതും 21ല്‍ പത്തും സ്ഥാനത്തുണ്ടായിരുന്ന ജില്ല ഇക്കുറി 2018, 2019 വര്‍ഷങ്ങളിലെ അഞ്ചാം സ്ഥാനം തിരിച്ചുപിടിച്ചു. ജില്ലയില്‍ 18,669 ആണ്‍കുട്ടികളും 17,244 പെണ്‍കുട്ടികളുമടക്കം 35,913 വിദ്യാര്‍ഥികളാണ് പരീക്ഷയെഴുതിയത്.
ഇതില്‍ 18,502 ആണ്‍കുട്ടികളും 17,169 പെണ്‍കുട്ടികളും അടക്കം 35,671 പേരാണ് ഉപരിപഠനത്തിന് യോഗ്യത നേടിയത്. കഴിഞ്ഞ വര്‍ഷം 35,402 പേരാണ് യോഗ്യര്‍. 167 ആണ്‍കുട്ടികളും 75 പെണ്‍കുട്ടികളും അടക്കം 242 പേരാണ് അയോഗ്യര്‍. 54 സര്‍ക്കാര്‍ സ്കൂളുകളും 104 എയ്ഡഡ് സ്കൂളുകളും 32 അണ്‍ എയ്ഡഡ് സ്കൂളുകള്‍ അടക്കം 190 വിദ്യാലയങ്ങള്‍ 100 ശതമാനം വിജയം നേടി. കഴിഞ്ഞ വര്‍ഷം 177 സ്കൂളുകളാണ് 100 ശതമാനം നേടിയത്.
4323 കുട്ടികള്‍ക്ക് എല്ലാ വിഷയത്തിനും എ പ്ലസ് ലഭിച്ചു. 3157 പെണ്‍കുട്ടികളും 1166 ആണ്‍കുട്ടികളുമാണ് എ പ്ലസ് നേടിയത്. കഴിഞ്ഞവര്‍ഷം 11,960 പേര്‍ക്കായിരുന്നു മുഴുവന്‍ എ പ്ലസ്. കൂടുതല്‍ എ പ്ലസ് ഇരിങ്ങാലക്കുട വിദ്യാഭ്യാസ ജില്ലക്കാണ്. 1221 പെണ്‍കുട്ടികളും 481 ആണ്‍കുട്ടികളും അടക്കം ഇരിങ്ങാലക്കുടക്ക് 1702 എ പ്ലസ് ലഭിച്ചു. 951 പെണ്‍കുട്ടികളും 369 ആണ്‍കുട്ടികളും അടക്കം തൃശൂരിന് 1320ഉം 985 പെണ്‍കുട്ടികളും 316 ആണ്‍കുട്ടികളും അടക്കം ചാവക്കാടിന് 1301 എ പ്ലസുമാണ് ലഭിച്ചത്.
വിദ്യാഭ്യാസ ജില്ലകളില്‍ 99.69 ശതമാനത്തോടെ തൃശൂരാണ് വിജയ ശതമാനത്തില്‍ മുന്നില്‍. തൃശൂര്‍ വിദ്യാഭ്യാസ ജില്ലയില്‍ പരീക്ഷയെഴുതിയ 9909 വിദ്യാര്‍ഥികളില്‍ 9878 പേര്‍ വിജയിച്ചു. ഇരിങ്ങാലക്കുട വിദ്യാഭ്യാസ ജില്ലയില്‍ പരീക്ഷയെഴുതിയ 11,079 വിദ്യാര്‍ഥികളില്‍ 11,068 പേര്‍ വിജയിച്ചു. 99.9 ആണ് വിജയശതമാനം. കൂടുതല്‍ വിദ്യാര്‍ഥികളുള്ള ചാവക്കാട് വിദ്യാഭ്യാസ ജില്ലയില്‍ 14,925 പേരില്‍ 14,725 പേരും വിജയിച്ചു. 98.66 ആണ് ചാവക്കാടിന്‍റെ വിജയശതമാനം. സര്‍ക്കാര്‍ വിദ്യാലയങ്ങളില്‍ പി. ഭാസ്കരന്‍ മെമ്മോറിയല്‍ ഗവ. എച്ച്‌.എസ്.എസ് കൊടുങ്ങല്ലൂര്‍ (334), ഗവ. വി.എച്ച്‌.എസ്.എസ് പഴഞ്ഞി (219), ജി.കെ.വിഎച്ച്‌.എസ്.എസ് എറിയാട് (202) എന്നിവ കൂടുതല്‍ വിദ്യാര്‍ഥികളെ പരീക്ഷക്കിരുത്തി 100 ശതമാനം നേടി.
സെന്‍റ് സെബാസ്റ്റ്യന്‍സ് എച്ച്‌.എസ്.എസ് കുറ്റിക്കാട് (407), തൃശൂര്‍ സേക്രഡ് ഹാര്‍ട്ട് ജി.എച്ച്‌.എസ്.എസ്.എസ് (374), വരന്തരപ്പിള്ളി സി.ജെ.എം.എ.എച്ച്‌.എസ്.എസ് (343), തലോര്‍ ദീപ്തി (334), ഏങ്ങണ്ടിയൂര്‍ സെന്‍റ് തോമസ് എച്ച്‌.എസ്.എസ് (314), ഇരിങ്ങാലക്കുട എല്‍.എഫ്.സി.എച്ച്‌.എസ് (291), കോട്ടപ്പുറം സെന്‍റ് ആന്‍സ് എച്ച്‌.എസ് (286) എന്നിവ എയ്ഡഡ് സ്കൂളുകളില്‍ 100 ശതമാനം വിജയം നേടി. കേരള കലാമണ്ഡലത്തില്‍ പരീക്ഷക്കിരുന്ന 68 പേരും ജയിച്ചു.
