ചെന്നൈ : സുഗമമായ ജലവിതരണത്തിന് ശിരുവാണി ഡാമില്‍ പരമാവധി ജലം സംഭരിച്ച്‌ തമിഴ്നാടിന് ലഭ്യമാക്കാന്‍ നടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രി എം.കെ സ്റ്റാലിന്‍ കേരള മുഖ്യമന്ത്രി പിണറായി വിജയന് കത്തെഴുതി. കോയമ്പത്തൂര്‍ കോര്‍പറേഷന്‍ പരിധിയിലെയും സമീപ പ്രദേശങ്ങളിലെയും ജനങ്ങള്‍ കുടിവെള്ളത്തിന് ശിരുവാണി ഡാമിനെയാണ് മുഖ്യമായും ആശ്രയിക്കുന്നത്. വര്‍ഷന്തോറും ശിരുവാണി ഡാമില്‍നിന്ന് 1.30 ടി.എം.സി ജലം തമിഴ്നാടിന് വിട്ടുനല്‍കണം. എന്നാല്‍, ആറു വര്‍ഷമായി 0.484 – 1.128 ടി.എം.സി ജലം മാത്രമാണ് ലഭ്യമായത്.
സമുദ്രനിരപ്പില്‍നിന്ന് 878.50 മീറ്ററാണ് ഡാമിന്റെ പരമാവധി സംഭരണശേഷി. എന്നാല്‍, മതിയായ മഴ ലഭ്യമായിട്ടും കഴിഞ്ഞ മൂന്നു വര്‍ഷമായി കേരള ജലസേചന വകുപ്പ് കുറഞ്ഞ വിതാനത്തിലാണ് ജലം സംഭരിക്കുന്നത്. ഇതുകാരണം കരാര്‍ പ്രകാരം അനുവദിക്കേണ്ട ജലം പൂര്‍ണമായും തമിഴ്നാടിന് ലഭ്യമാവുന്നില്ലെന്നാണ് പരാതി. കേരള മുഖ്യമന്ത്രി ഇടപെട്ട് പരമാവധി ശേഷി വരെ ജലം സംഭരിക്കാന്‍ ബന്ധപ്പെട്ട അധികൃതര്‍ക്ക് നിര്‍ദേശം നല്‍കണമെന്നാണ് സ്റ്റാലിന്റെ ആവശ്യം. കേരള-തമിഴ്നാട് അതിര്‍ത്തിയില്‍ പാലക്കാട് ജില്ലയിലെ മണ്ണാര്‍ക്കാട് താലൂക്കിലാണ് ശിരുവാണി ഡാം സ്ഥിതി ചെയ്യുന്നത്.
