മൂന്നാര് : സര്ക്കാര് ഗോഡൗണില് നിന്ന് ലക്ഷങ്ങള് വിലമതിക്കുന്ന സ്ട്രോബറി ഉത്പന്നങ്ങള് മറിച്ചുവിറ്റ സംഭവത്തില് സിപിഐ ബ്രാഞ്ച് സെക്രട്ടറി അറസ്റ്റില്. കൂട്ടുപ്രതികളായ രണ്ടു പേര് ഒളിവിലാണ്. മൂന്നാര് – സൈലന്റ്വാലി റോഡില് ഐബി കോട്ടേജിന് സമീപം 20മുറി ലയത്തില് എം.മുരുകന് (52) ആണ് പോലീസ് പിടിയിലായത്. സിപിഐ മൂന്നാര് ഇക്കാ നഗര് ബ്രാഞ്ച് സെക്രട്ടറിയാണ് മുരുകന്. ഹോര്ട്ടികോര്പ് ഗോഡൗണിലെ താത്കാലിക ജീവനക്കാരനാണ് ഇയാള്. സര്ക്കാര് ഗോഡൗണില് നിന്ന് 2021 ജനുവരി മുതല് 2022 മാര്ച്ച് ഏഴു വരെയുള്ള കാലത്ത് സ്ട്രോബറി പ്രിസര്വ് ഉള്പ്പെടെയുള്ള സാധനങ്ങള് പലപ്പോഴായി കടത്തിക്കൊണ്ടുപോയി വ്യാപാര സ്ഥാപനങ്ങൡ വിറ്റഴിക്കുകയായിരുന്നു.
ഹോര്ട്ടികോര്പിന്റെ സൈലന്റ്വാലി റോഡിലുള്ള ഗോഡൗണില് നിന്ന് ഉത്പന്നങ്ങള് കടത്തിക്കൊണ്ടുപോയത്. ഹോര്ട്ടികോര്പ് മാനേജര് നല്കിയ പരാതിയില് പൊലീസ് നടത്തിയ അന്വേഷണത്തിലാണ് ഇയാള് പിടിയിലായത്. സാധനങ്ങള് കടത്തിക്കൊണ്ടു പോകുന്ന സിസിടിവി ദൃശ്യങ്ങള് ഉള്പ്പെടെയാണ് പരാതി നല്കിയത്.സംഭവത്തില് പിടിയിലായ പ്രതിയും ഒളിവിലുള്ള പ്രതികളും ഗോഡൗണിലെ താത്കാലിക ജീവനക്കാരാണ്. സാധനങ്ങള് വിറ്റ കടകളില് പ്രതിയുമായി പൊലീസ് എത്തി തെളിവെടുത്തു. ദേവികുളം കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
