റാന്നി : സംസ്ഥാനപാതയുടെ പുനരുദ്ധാരണത്തിന്റെ ഭാഗമായി സ്ഥാപിച്ച തെരുവു വിളക്കുകൾ പ്രകാശിച്ചു തുടങ്ങി. പുനലൂർ-മൂവാറ്റുപുഴ സംസ്ഥാന പാതയിലെ പ്ലാച്ചേരി-കോന്നി ഭാഗത്തു സ്ഥാപിച്ച വിളക്കുകളാണ് തെളിഞ്ഞത്. ജില്ലാ അതിര്ത്തിയായ പ്ലാച്ചേരി മുതൽ മക്കപ്പുഴ ഗേറ്റവരെ റോഡിന് ഇരു വശത്തായി ഉള്ള 18 തെരുവു വിളക്കുകളാണ് ശനിയാഴ്ച വൈകീട്ട് ആറുമണിയോടെ പ്രകാശിച്ചത്.
ഈ ഭാഗത്തെ വൈദ്യുതി കണക്ഷനായി റോഡ് നിർമ്മാണ ചുമതലയുള്ള കെ.എസ്.ടി.പി. അധികൃതര് പണമടച്ചതിന് പിന്നാലെ കെ.എസ്.ഇ .ബി . ജീവനക്കാരെത്തി കണക്ഷൻ നൽകുകയായിരുന്നു. ശേഷിക്കുന്ന ഭാഗങ്ങളിലെ പണമടയ്ക്കുന്ന മുറയ്ക്ക് കണക്ഷൻ ലഭിക്കുമെന്ന് കെ.എസ്.ഇ.ബി അധികൃതര് പറഞ്ഞു. പ്ലാച്ചേരി മുതൽ കോന്നിവരെ 328 തെരുവു വിളക്കുകളാണ് സ്ഥാപിച്ചിട്ടുള്ളത്. ഏഴുമീറ്ററാണ് തെരുവു വിളക്കുകളുടെ തൂണിന്റെ ഉയരം. ഇത് മുഴുവന് പ്രകാശിക്കുന്നതോടെ രാത്രി യാത്ര സുഗമമാകും.
