റാന്നി : വെച്ചൂച്ചിറ പഞ്ചായത്തിലെ പെരുന്തേനരുവി പത്താം വാർഡിൽ തെരുവു വിളക്കുകള് ഇല്ലാത്ത സ്ഥലങ്ങളിൽ ഉടന് വഴി വിളക്കുകള് സ്ഥാപിക്കണമെന്ന് എ.ഐ.വൈ.എഫ് മേഖലാ കമ്മറ്റി ആവശ്യപ്പെട്ടു. ഇവിടെ ഒരുവശം പമ്പാനദിയും മറുകര പെരുന്തേനരുവി വനപ്രദേശവുമാണ്. കാട്ടുമൃഗങ്ങളായ പോത്ത്, ആന, മ്ലാവ്, പന്നി എന്നിവ മിക്ക രാത്രികളിലും അരുവിലൂടെ നീന്തിയെത്തി ജനവാസകേന്ദ്രങ്ങളിൽ കടക്കുന്നുണ്ട്. കഴിഞ്ഞദിവസം പത്രം ഏജന്റുമാരുടെ ഇരുചക്ര വാഹനത്തിനു മുൻപിൽ കാട്ടുപന്നി ചാടി അപകടമുണ്ടായ സംഭവമുണ്ടായി.
ആന ശല്യവും രൂക്ഷമാണ്. നവോദയ മുതൽ പെരുന്തേനരുവി വരെയും കൈതമല മുതല് പരുവ വരെയുമുള്ള വഴി പൂര്ണ്ണമായും ഇരുട്ടിലാണ്. ഇവിടെ വഴി വിളക്കുകള് സ്ഥാപിക്കുവാന് തയ്യാറാവണമെന്ന് മേഖലാ കമ്മറ്റി അധികൃതരോടാവശ്യപ്പെട്ടു. മണ്ഡലം വൈസ് പ്രസിഡൻറ് എം.കെ ജയപ്രകാശ് ഉദ്ഘാടനം ചെയ്തു. മേഖലാ പ്രസിഡന്റ് സിജോ ജോസ് മടുക്കകുഴി അധ്യക്ഷത വഹിച്ചു. സെക്രട്ടറി ബ്രൈറ്റ് ബാബു, സീജന് ചാത്തന്തറ, രാജേഷ് നെല്ലിമല, സന്തോഷ് പീറ്റർ, ഗിരീഷ് പരുവ എന്നിവര് പ്രസംഗിച്ചു
