വെഞ്ഞാറമൂട് : തിരുവനന്തപുരത്ത് വിദ്യാര്ത്ഥിക്ക് അദ്ധ്യാപകന്റെ ക്രൂര മര്ദ്ദനം. എട്ടാം ക്ലാസ് വിദ്യാര്ത്ഥിയെ ക്ലാസ് മുറിയില് വച്ച് ക്രൂരമായി മര്ദ്ദിച്ചതായാണ് പരാതി. ഇതുകണ്ട് ദേഹാസ്വാസ്ഥ്യം ഉണ്ടായ സഹപാഠിയായ വിദ്യാര്ത്ഥിനിയുടെ രക്ഷകര്ത്താക്കള് നല്കിയ പരാതിയില് അദ്ധ്യാപകനെതിരെ വെഞ്ഞാറമൂട് പോലീസ് കേസെടുത്തു. സ്കൂളിലെ താത്കാലിക അദ്ധ്യാപകനെതിരെയാണ് പോലീസ് കേസെടുത്തത്. പ്രതി കുട്ടികളെ ക്രൂരമായി മര്ദ്ദിക്കുന്നത് പതിവാണെന്നും ക്ലാസ് മുറിയുടെ വാതില് ചാരിയാണ് മര്ദ്ദിക്കാറുള്ളതെന്നും കുട്ടികള് പറഞ്ഞതായി രക്ഷകര്ത്താക്കള് പറയുന്നു.
സംഭവത്തെ കുറിച്ച് ക്ലാസ് ടീച്ചറെ വിളിച്ചു വിവരം അറിയിച്ചപ്പോള് ക്ലാസ് ടീച്ചര് ആശ്വാസകരമായ മറുപടിയല്ല നല്കിയതെന്നും തുടര്ന്നാണ് പോലീസില് പരാതി നല്കിയതെന്നുമാണ് രക്ഷകര്ത്താക്കള് പറയുന്നത്. അതേസമയം, മര്ദ്ദനമേറ്റ കുട്ടിയുടെ രക്ഷകര്ത്താക്കളില് നിന്നും ഇതുവരെയും പരാതികള് ലഭിച്ചിട്ടിലല്ലെന്നും കണ്ടുനിന്ന് ദേഹാസ്വാസ്ഥ്യം ഉണ്ടായ കുട്ടിയുടെ രക്ഷകര്ത്താക്കളുടെ പരാതിയുടെ അടി സ്ഥാനത്തിലാണ് അദ്ധ്യാപകനെതിരെ കേസെടുത്തിട്ടുള്ളതെന്നും വെഞ്ഞാറമൂട് സിഐ സൈജു നാഥ് പറഞ്ഞു.
