പെരിന്തല്മണ്ണ : പ്രണയം നിരസിച്ചതിലുള്ള വിരോധത്തില് കുത്തിക്കൊല്ലാനെത്തിയ 22 വയസ്സുകാരനെ ധീരമായി നേരിട്ട് 14 വയസ്സുകാരി. കത്തിയുമായി പിന്തുടര്ന്ന് കുത്താനെത്തിയ യുവാവിനെ പെണ്കുട്ടി ബലമായി പിടിച്ചു തള്ളുകയായിരുന്നു. കഴിഞ്ഞ ദിവസം രാവിലെ എട്ടോടെ ആനമങ്ങാട്ടായിരുന്നു സംഭവം. മണ്ണാര്മല സ്വദേശി ജിനേഷിനെ (22) പോലീസ് അറസ്റ്റ് ചെയ്തു.
പോലീസ് പറയുന്നത് ഇങ്ങനെ : കുറച്ച് കാലമായി പെണ്കുട്ടിയെ പ്രതി നിരന്തരം ശല്യം ചെയ്തിരുന്നു. പ്രണയാഭ്യര്ഥന നിരസിച്ച പെണ്കുട്ടിയെ കൊല്ലണമെന്ന ഉദ്ദേശ്യത്തോടെ കത്തിയുമായി എത്തിയ പ്രതി ആനമങ്ങാട്ടുവെച്ച് തടഞ്ഞുനിര്ത്തി കുത്താന് ശ്രമിക്കുകയായിരുന്നു. പരിഭ്രമിച്ചെങ്കിലും യുവാവിനെ പിടിച്ചു തള്ളി പെണ്കുട്ടി ബഹളം വെച്ചു.
നിലത്തുവീണ യുവാവിന്റെ കയ്യില്നിന്ന് കത്തി തെറിച്ചുപോയി. നാട്ടുകാര് ഓടിക്കൂടുന്നതിനിടെ പ്രതി ഓടി രക്ഷപെടാന് ശ്രമിച്ചു. ഈ സമയം വന്ന വാഹനത്തില് തട്ടി ഇയാളുടെ കൈക്ക് പരുക്കേറ്റു. തുടര്ന്ന് പോലീസെത്തി ജിനേഷിനെ കസ്റ്റഡിയിലെടുക്കുകയായിരുന്നു. പ്രതി കൊണ്ടുവന്ന കത്തി പോലീസ് കണ്ടെടുത്തു.
