കോന്നി : കെ എസ് അര് ടി സി ഓപ്പറേറ്റിംഗ് സ്റ്റേഷന്റെ പരിസരങ്ങളില് വിദ്യാര്ത്ഥി സംഘര്ഷങ്ങള് പതിവാകുന്നു. കഴിഞ്ഞ കുറച്ച് ദിവസങ്ങള്ക്കുള്ളില് നാല് തവണയോളമാണ് വിദ്യാര്ത്ഥികള് തമ്മില് വാക്കേറ്റവും സംഘര്ഷങ്ങളും ഉണ്ടായത്. വിദ്യാര്ത്ഥികള് തമ്മിലുള്ള പ്രശ്നങ്ങളില് പുറത്ത് നിന്ന് എത്തുന്ന സംഘങ്ങളും ഇവിടെ സംഘര്ഷങ്ങള് സൃഷ്ടിക്കുന്നുണ്ട്. ഇത് വിവിധ ആവശ്യങ്ങള്ക്കായി കോന്നിയില് എത്തുന്ന പൊതുജനങ്ങള്ക്കും കോന്നിയിലെ വ്യാപാരികള്ക്കും ഒരു പോലെ ബുദ്ധിമുട്ട് സൃഷ്ടിക്കുന്നുണ്ട്.
എന്നാല് നഗരത്തില് വിദ്യാര്ത്ഥികള് തമ്മില് സംഘര്ഷം തുടരുമ്പോഴും പോലീസ് നോക്കുകുത്തിയായി തുടരുന്നു എന്നാണ് നാട്ടുകാരുടെ ആക്ഷേപം. മുന്പ് കോന്നി കെ എസ് ആര് ടി സി ഓപ്പറേറ്റിംഗ് സ്റ്റേഷന് കേന്ദ്രീകരിച്ച് അനാശ്യാസ പ്രവര്ത്തനങ്ങള് വര്ധിക്കുന്നുവെന്ന് മാധ്യമങ്ങളില് വാര്ത്തകള് വന്നതിനെ തുടര്ന്ന് പോലീസ് പരിശോധന നടത്തിയിരുന്നു എങ്കിലും പിന്നീട് ഇതുണ്ടായില്ല. കോന്നിയിലെ ഇത്തരം വിദ്യാര്ത്ഥി സംഘര്ഷങ്ങള് തടഞ്ഞില്ലെങ്കില് വലിയ അക്രമ സംഭവങ്ങള് ഉണ്ടാകുന്നതിനും സാധ്യത ഏറെയാണ്.
