കൊല്ലം : ഓടുന്ന ബസില് നിന്നു വിദ്യാര്ഥി തെറിച്ചുവീണ സംഭവത്തില് ജീവനക്കാര്ക്ക് വീഴ്ച്ച ഉണ്ടായിട്ടില്ലെന്ന് കെഎസ്ആര്ടിസി. വിദ്യാര്ഥി പുറത്തേക്കു വീണ ഉടനെ ബസ് നിര്ത്തി. എന്നാല് ബസിന് പുറകെ വന്നവര് വിദ്യാര്ത്ഥിയെ ആശുപത്രിയില് കൊണ്ടുപോയതിനാല് ഇറങ്ങിയില്ലെന്നാണ് കൊട്ടാരക്കര ഡിപ്പോ ജനറല് കണ്ട്രോളിംഗ് ഇന്സ്പെക്ടറുടെ പ്രതികരണം.
സംഭവം ഉണ്ടായ ഉടന് ജീവനക്കാര് അപകടത്തെക്കുറിച്ച് എഴുകോണ് പോലീസ് സ്റ്റേഷനില് അറിയിച്ചിരുന്നുവെന്നും കണ്ട്രോളിംഗ് ഇന്സ്പെക്ടര് പറഞ്ഞു. എഴുകോണ് ടെക്നിക്കല് സ്കൂളിലെ 9-ാം ക്ലാസ് വിദ്യാര്ഥി നാന്തിരിക്കല് ഷീബ ഭവനില് സുനില്, ഷീന ദമ്പതികളുടെ മകന് നിഖില് സുനില് (14) ആണ് ചൊവ്വാഴ്ച്ച ബസില് നിന്നും തെറിച്ചു വീണത്.
വൈകിട്ട് 4.15നു കുണ്ടറ എഴുകോണ് പെട്രോള് പമ്പിനു സമീപത്തായിരുന്നു അപകടം. സ്കൂള് വിട്ടശേഷം കൊട്ടാരക്കരയില് നിന്നുള്ള കരുനാഗപ്പള്ളി ബസില് തിരികെ വീട്ടിലേക്കു പോകുമ്പോഴായിരുന്നു അപകടം. തിരക്കുള്ള ബസില് നിഖിലും സുഹൃത്തുക്കളും വാതില്പടിയില് നിന്ന് യാത്ര ചെയ്യുകയായിരുന്നു. ബസ് വേഗത്തില് വളവു തിരിഞ്ഞപ്പോള് നിഖില് വാതില് തുറന്നു പുറത്തേക്കു വീഴുകയായിരുന്നു.
