തൃശൂര് : കഴിഞ്ഞ രണ്ടുവര്ഷത്തെ ഓണ്ലൈന് പഠനത്തില് അഞ്ചാം ക്ലാസ് വരെയുള്ള വിദ്യാര്ഥികളുടെ പഠനനിലവാരം തീരെ താഴ്ന്നതായി വിലയിരുത്തല്. ഒന്നും രണ്ടും മൂന്നും ക്ലാസുകളിലെ കുട്ടികളില് ഭൂരിഭാഗം പേര്ക്കും അക്ഷരം എഴുതാനോ വായിക്കാനോ പോലും അറിയാത്ത സാഹചര്യമാണുള്ളത്. ഓണ്ലൈന് പഠനത്തിനിടെ അധ്യാപകര് ചോദ്യങ്ങള് ചോദിക്കുമ്പോഴും എഴുതിച്ചപ്പോഴും എല്ലാം കൃത്യമായി ചെയ്തിരുന്ന വിദ്യാര്ഥികള് നേരിട്ടു ക്ലാസിലെത്തിയപ്പോള് അധ്യാപകരുടെ മുമ്പില് ഒന്നും അറിയാതെ നില്ക്കുകയാണ്. മാതാപിതാക്കളുടെ സഹായത്തോടെയാണ് പലരും അധ്യാപകര് പഠിപ്പിക്കുമ്പോള് ചോദ്യങ്ങള്ക്കു മറുപടി പറഞ്ഞിരുന്നതെന്നു തെളിഞ്ഞെന്ന് അധ്യാപകര് പറയുന്നു.
വീട്ടിലിരുന്നു കുട്ടികളെ കൂടുതല് സഹായിച്ചതാണ് നിലവാരം കുറയാന് കാരണം. കുട്ടികള്ക്കു മാര്ക്ക് കിട്ടുന്നതിനായി മാതാപിതാക്കള്തന്നെ എഴുതിക്കൊടുത്തും അടുത്തിരുന്ന് ഉത്തരങ്ങള് പറഞ്ഞുകൊടുത്തും സഹായിച്ചതാവും ഇത്തരത്തില് കുട്ടികളുടെ പഠന നിലവാരം കുറയാന് കാരണമെന്നാണു വിലയിരുത്തല്. ചെറിയ ക്ലാസുകളിലെ കുട്ടികള്ക്ക് ഓണ്ലൈന് പഠനം ഗുണകരമാകില്ലെന്നു നേരത്തെതന്നെ ആശങ്കയുയര്ന്നിരുന്നു. സാധാരണ ക്ലാസുകളില് എത്തുമ്പോള് അധ്യാപകര് കുട്ടികളെ ചേര്ത്തിരുത്തി കൈപിടിച്ച് അക്ഷരങ്ങള് എഴുതിക്കുകയും ഉച്ചാരണം പറയിക്കുകയുമൊക്കെ ചെയ്യും.
എന്നാല് അകലെയിരുന്ന് ഓണ്ലൈനില് പഠിക്കുന്ന കുട്ടികളെ അത്തരത്തില് പരിശീലിപ്പിക്കാന് കഴിഞ്ഞിരുന്നില്ല. തങ്ങളുടെ മക്കള് പരീക്ഷയിലും ചോദ്യങ്ങള് ചോദിക്കുമ്പോഴും പിന്നിലാകാന് പാടില്ലെന്നുകണ്ട് മാതാപിതാക്കള് സഹായിച്ചതു സ്വന്തം കുട്ടികള്ക്കുതന്നെ വിനയായിരിക്കയാണ്. ഓണ്ലൈനില് പഠിപ്പിക്കുമ്പോള് മാതാപിതാക്കള് സഹായിക്കുന്നുണ്ടെന്നു മനസിലാക്കി അങ്ങനെ ചെയ്യരുതെന്ന് ഇടയ്ക്കിടെ ഓര്മിപ്പിക്കാറുണ്ടായിരുന്നുവെങ്കിലും അതൊന്നും പലരും അനുസരിച്ചില്ലെന്നാണ് കുട്ടികള് നേരിട്ടു ക്ലാസിലെത്തിയപ്പോള് ബോധ്യമായിരിക്കുന്നതെന്ന് അധ്യാപകര് പറഞ്ഞു.