പാലക്കാട് : എലപ്പുള്ളി പോപ്പുലര്‍ ഫ്രണ്ട് നേതാവ് സുബൈര്‍ വധക്കേസില്‍ മൂന്നുപേര്‍ പിടിയിലായതായി പോലീസ്. കൊലപാതകത്തില്‍ നേരിട്ട് പങ്കെടുത്ത മൂന്നുപേരെയാണ് അന്വേഷണസംഘം കസ്റ്റഡിയിലെടുത്തത്. പിടിയിലായ പ്രതികളെ ചോദ്യം ചെയ്യല്‍ തുടരുകയാണെന്നും തിരിച്ചറിയല്‍ പരേഡ് ഉള്‍പ്പെടെ പൂര്‍ത്തിയാക്കാനുണ്ടെന്നും പോലീസ് അറിയിച്ചു. അതിനാല്‍ ഇവരുടെ പേരുകളും മറ്റ് വിശദാംശങ്ങളും നിലവില്‍ വെളിപ്പെടുത്താന്‍ കഴിയില്ലെന്നും പോലീസ് വ്യക്തമാക്കി.
ആര്‍എസ്‌എസ് മുന്‍ ജില്ലാ ശാരീരിക് ശിക്ഷണ്‍ പ്രമുഖ് എ ശ്രീനിവാസന്റെ കൊലപാതകത്തില്‍ ആറു പ്രതികളെ തിരിച്ചറിഞ്ഞതായി എഡിജിപി വിജയ് സാക്കറെ അറിയിച്ചു. ഇവരെക്കുറിച്ചും വ്യക്തമായ സൂചന ലഭിച്ചിട്ടുണ്ടെന്നും രണ്ടു പേരെക്കൂടി തിരിച്ചറിയാനുണ്ടെന്നും അദ്ദേഹം വ്യക്തമാക്കി. പ്രതികള്‍ എസ്‌ഡിപിഐ-പോപ്പുലര്‍ ഫ്രണ്ട് ബന്ധമുള്ളവരാണെന്നും പ്രതികളില്‍ ചിലര്‍ ഒളിവിലാണെന്നും എഡിജിപി അറിയിച്ചു.
വെള്ളിയാഴ്ച ഉച്ചയ്ക്ക് പള്ളിയില്‍ നിന്ന് പിതാവിനോടൊപ്പം ബൈക്കില്‍ മടങ്ങുകയായിരുന്ന സുബൈറിനെ എലപ്പുള്ളി നോമ്പിക്കോട്ടുവെച്ച്‌ അക്രമി സംഘം കാറിടിച്ചു വീഴ്ത്തി വെട്ടിക്കൊലപ്പെടുത്തുകയായിരുന്നു. ആക്രമണം നടന്ന് 24 മണിക്കൂര്‍ തികയുന്നതിന് മുന്‍പ് ശനിയാഴ്ച ഉച്ചയോടെ പാലക്കാട് മേലാമുറി ജംഗ്ഷന് സമീപമുള്ള കടയില്‍ എത്തിയ അക്രമികള്‍ ശ്രീനിവാസനെ വെട്ടിവീഴ്ത്തുകയായിരുന്നു.
