ന്യൂഡൽഹി : രാഷ്ട്രീയ അഭ്യൂഹങ്ങൾ സൃഷ്ടിച്ച് മുതിർന്ന ബിജെപി നേതാവും രാജ്യസഭാംഗവുമായ സുബ്രഹ്മണ്യ സ്വാമി ഇന്ന് പശ്ചിമ ബംഗാൾ മുഖ്യമന്ത്രി മമതാ ബാനർജിയെ കാണും. മൂന്ന് ദിവസത്തെ ഡൽഹി സന്ദർശനത്തിനെത്തിയ മമതയെ വൈകീട്ട് 3.30 ഓടെ സ്വാമി കാണുമെന്നാണ് റിപ്പോർട്ടുകൾ. തൃണമൂൽ കോൺഗ്രസ് തന്നെയാണ് മമത – സ്വാമി കൂടിക്കാഴ്ച ഔദ്യോഗികമായി അറിയിച്ചത്.
മോദി സർക്കാരിന്റെ സാമ്പത്തിക – വിദേശ നയങ്ങളിൽ സ്ഥിരം വിമർശകനായ സുബ്രഹ്മണ്യ സ്വാമിയെ ഇയ്യിടെ നടന്ന സംഘടനാ പുനഃസംഘടനത്തിൽ ബിജെപി ദേശീയ നിർവാഹക സമിതിയിൽ നിന്ന് ഒഴിവാക്കിയിരുന്നു. ഇതിന് പിന്നാലെ ട്വിറ്റർ ബയോയിൽ നിന്ന് ബിജെപി എന്നത് സ്വാമി ഒഴിവാക്കുകയും ചെയ്തു. ഈ സാഹചര്യത്തിലാണ് സ്വാമി – മമത കൂടിക്കാഴ്ചക്ക് രാഷ്ട്രീയ പ്രധാന്യം ഏറുന്നത്. ഹരിയാന മുൻ കോൺഗ്രസ് അധ്യക്ഷൻ അശോക് തൻവറും മുൻ എംപി കീർത്തി ആസാദും കഴിഞ്ഞ ദിവസം തൃണമൂലിൽ ചേർന്നിരുന്നു.
