കൊല്ലം: പരവൂര് കോടതി അസിസ്റ്റന്റ് പബ്ലിക് പ്രോസിക്യൂട്ടറായിരുന്ന എസ്.അനീഷ്യ (41) ജീവനൊടുക്കിയ കേസില് മേലുദ്യോഗസ്ഥന്റെയും സഹപ്രവര്ത്തകന്റെയും അറസ്റ്റ് ക്രൈംബ്രാഞ്ച് രേഖപ്പെടുത്തി. ഡെപ്യൂട്ടി ഡയറക്ടര് ഓഫ് പ്രോസിക്യൂഷന് പെരുമ്പാവൂര് മുടിക്കല് സ്കൂള്പടി പുത്തന്പീടികയില് വീട്ടില് അബ്ദുല് ജലീല് (48), അനീഷ്യയുടെ സഹപ്രവര്ത്തകന് അസിസ്റ്റന്റ് പബ്ലിക് പ്രോസിക്യൂട്ടര് തിരുവനന്തപുരം കിളിമാനൂര് മലയമഠം അശ്വതിയില് കെ.ആര്.ശ്യാംകൃഷ്ണ (38) എന്നിവരെയാണ് അറസ്റ്റ് ചെയ്തത്. പരവൂര് കോടതിയില് ഹാജരാക്കിയ ഇവരെ ജാമ്യത്തില് വിട്ടു. ഇരുവരും കഴിഞ്ഞ ദിവസം ഹൈക്കോടതിയില്നിന്ന് മുന്കൂര് ജാമ്യം നേടിയിരുന്നു. പരവൂര് നെടുങ്ങോലത്തെ വീട്ടില് ജനുവരി 21-നാണ് അനീഷ്യയെ മരിച്ചനിലയില് കണ്ടത്.
സഹപ്രവര്ത്തകനും മേലുദ്യോഗസ്ഥനും മാനസികമായി ബുദ്ധിമുട്ടിച്ചെന്ന് ഡയറിക്കുറിപ്പിലും ശബ്ദരേഖയിലും അനീഷ്യ പറഞ്ഞിരുന്നു. ആത്മഹത്യാപ്രേരണക്കുറ്റം, സംഘംചേര്ന്നുള്ള കുറ്റകൃത്യം എന്നീ വകുപ്പുകളാണ് ഇവര്ക്കെതിരേ ചുമത്തിയിട്ടുള്ളത്. അസ്വാഭാവികമരണത്തിനാണ് പരവൂര് പോലീസ് ആദ്യം കേസെടുത്തിരുന്നത്. പിന്നീട് അന്വേഷണച്ചുമതല കൊല്ലം സിറ്റി ക്രൈംബ്രാഞ്ച് സംഘത്തെ ഏല്പിച്ചു. മകളുടെ മരണം സംബന്ധിച്ച കേസ് സി.ബി.ഐ.ക്ക് കൈമാറണമെന്നാവശ്യപ്പെട്ട് അനീഷ്യയുടെ അമ്മ ഹൈക്കോടതിയെ സമീപിച്ചതിനെ തുടര്ന്ന് സംസ്ഥാന ക്രൈംബ്രാഞ്ച് അന്വേഷണം ഏറ്റെടുക്കുകയായിരുന്നു. ഇപ്പോള് അറസ്റ്റിലായ രണ്ടുപേരെയും നേരത്തേ അന്വേഷണവിധേയമായി സസ്പെന്ഡ് ചെയ്തിരുന്നു.