കലഞ്ഞൂര് : കലഞ്ഞൂര് മല്ലങ്കഴയില് വേനല് മഴയിലും ശക്തമായ കാറ്റിലും വ്യാപക കൃഷി നാശം. മല്ലങ്കഴയില് ഇടയിലെ തുണ്ടിയില് വീട്ടില് ജി.വിശ്വനാഥന്റെ കൃഷിയിടത്തിലാണ് വലിയ നാശമുണ്ടായത്. ഓണം വിപണി മുന്നില് കണ്ട് വിശ്വനാഥന് കൃഷി ചെയ്തിരുന്ന 170 മൂട് വാഴകളാണ് കാറ്റില് നിലംപതിച്ചത്. ഇതില് കൂടുതലും കുലച്ച ഏത്തവാഴകള് ആയിരുന്നു. 200 മൂട് മരച്ചീനിയും കാറ്റില് പിഴുത് വീണു. ഒന്നര ലക്ഷം രൂപയുടെ നഷ്ടമാണ് ഈ കര്ഷകനുമാത്രം കണക്കാക്കുന്നത്. വര്ഷങ്ങളായി കൃഷി ചെയ്യുന്ന ആളാണ് വിശ്വനാഥന്. ഇതിന് സമീപത്ത് തന്നെയുള്ള മോഹനന് നായരുടെ കൃഷിയിടത്തിലെ 65 മൂട് വാഴയും കാറ്റില് നിലംപതിച്ചു. കൃഷിയില് വലിയ ലാഭം ലഭിക്കാതെയിരുന്നിട്ടും കൃഷിയോടുള്ള ആഗ്രഹം കൊണ്ടാണ് ഇത്രയും പണം മുടക്കി കൃഷി ചെയ്തിരുന്നതെന്നും എന്നാല് അതെല്ലാം വിഫലമായതായും കര്ഷകര് പറയുന്നു.
കൃഷിവകുപ്പില് നിന്നും ഉദ്യോഗസ്ഥര് എത്തി സ്ഥലം സന്ദര്ശിച്ച് പോയെങ്കിലും സര്ക്കാര് ഫണ്ട് കുറവായതിനാല് നഷ്ടപരിഹാരം ലഭിക്കാന് സാധ്യതയില്ല എന്നാണ് അധികൃതര് അറിയിച്ചത്. ഒടിഞ്ഞുവീണ വാഴകള് കൃഷിയിടത്തില് നിന്നും വെട്ടിമാറ്റിയെങ്കില് മാത്രമേ അടുത്ത കൃഷി ചെയ്യാന് ഇവര്ക്ക് സാധിക്കൂ. എന്നാല് ഒടിഞ്ഞു വീണ നൂറുകണക്കിന് വാഴകള് നീക്കം ചെയ്യുവാനും കര്ഷകര്ക്ക് നല്ലൊരു തുക ചിലവാകും. വേനല് മഴ ജില്ലയിലെ മലയോര മേഖലയ്ക്ക് ആശ്വാസമായെങ്കിലും പല സ്ഥലങ്ങളിലും കാര്ഷിക മേഖലയില് ഉണ്ടായ നാശനഷ്ടം ജില്ലയിലെ കര്ഷകര്ക്ക് വലിയ തിരിച്ചടിയാണ് സമ്മാനിച്ചത്.
