റാന്നി: മലയോര മേഖലയില് വേനല്മഴ ശക്തമാകുന്നു. കഴിഞ്ഞ ദിവസങ്ങളില് പെയ്ത കനത്ത മഴയ്ക്കൊപ്പം ഉണ്ടായ ശക്തമായ കാറ്റിലും മിന്നലിലും റാന്നിയിലും പരിസര പ്രദേശങ്ങളിലും വ്യാപകമായ നാശനഷ്ടങ്ങളാണ് റിപ്പോര്ട്ട് ചെയ്തിരിക്കുന്നത്. മിന്നല് ഭീതിയെത്തുടര്ന്ന് ജനങ്ങള് കടുത്ത ആശങ്കയിലാണ്. ശക്തമായ കാറ്റില് പലയിടങ്ങളിലും മരങ്ങള് കടപുഴകി വീടുകള്ക്ക് മുകളിലേക്ക് വീണു. വീടുകളുടെ മേല്ക്കൂര ഭാഗികമായി തകരുകയും നാശനഷ്ടങ്ങള് സംഭവിക്കുകയും ചെയ്തിട്ടുണ്ട്. രൂക്ഷമായ മിന്നലില് നിരവധി വീടുകളിലെ വൈദ്യുത ഉപകരണങ്ങളും വയറിംഗും പൂര്ണ്ണമായും നശിച്ചു. ജനലുകളും ചുവരുകളും മിന്നലേറ്റ ആഘാതത്തില് തകര്ന്ന സംഭവങ്ങളും ചിലയിടങ്ങളില് നിന്ന് റിപ്പോര്ട്ട് ചെയ്തിട്ടുണ്ട്. മരങ്ങള് വൈദ്യുതി ലൈനുകള്ക്ക് മുകളിലേക്ക് വീണതോടെ മേഖലയില് മണിക്കൂറുകളോളം വൈദ്യുതി ബന്ധം നിലച്ചു.
കെ.എസ്.ഇ.ബി ജീവനക്കാര് പുനരുദ്ധാരണ പ്രവര്ത്തനങ്ങള് നടത്തിവരികയാണ്. വേനല്മഴയ്ക്കൊപ്പം ഇടിയും മിന്നലും ശക്തമാകാന് സാധ്യതയുള്ളതിനാല് പൊതുജനങ്ങള് ജാഗ്രത പാലിക്കണമെന്ന് അധികൃതര് നിര്ദ്ദേശം നല്കി.ഇടിമിന്നലുള്ള സമയത്ത് തുറസ്സായ സ്ഥലങ്ങളില് നില്ക്കുന്നത് ഒഴിവാക്കുക.വൈദ്യുത ഉപകരണങ്ങളുടെ പ്ലഗ്ഗുകള് ഊരിയിടുക.വീടിന് ഭീഷണിയായ മരച്ചില്ലകള് വെട്ടിമാറ്റാന് ശ്രദ്ധിക്കുക.മഴ തുടരുന്ന സാഹചര്യത്തില് കൃഷിനാശവും റിപ്പോര്ട്ട് ചെയ്തിട്ടുണ്ട്. അര്ഹമായ നഷ്ടപരിഹാരം ലഭ്യമാക്കാന് റവന്യൂ അധികൃതര് അടിയന്തിരമായി ഇടപെടണമെന്നാണ് നാട്ടുകാരുടെ ആവശ്യം.
