ദില്ലി : വ്യക്തിപരമായോ ആഡംബരപരമായോ ഉള്ള ഭക്ഷണ സാധനങ്ങൾ ആവശ്യപ്പെടാൻ തടവുകാർക്ക് മൗലികാവകാശമില്ലെന്ന് സുപ്രീം കോടതി വിധിച്ചു. ഭിന്നശേഷിക്കാരാണെങ്കിൽ പോലും ഇത് ബാധകമാണ്. ഭിന്നശേഷിക്കാരുടെ അവകാശങ്ങൾ സംരക്ഷിക്കാൻ ഭരണഘടനാപരമായും ധാർമ്മികപരമായും സർക്കാരിന് ഉത്തരവാദിത്തമുണ്ടെങ്കിലും അത് ചെലവേറിയതോ ഇഷ്ടപ്പെട്ടതോ ആയ ഭക്ഷണം നൽകുന്നതിന് ബാധകമല്ലെന്ന് കോടതി വ്യക്തമാക്കി. ജസ്റ്റിസുമാരായ ജെ.ബി. പർദിവാല, ആർ. മഹാദേവൻ എന്നിവരടങ്ങിയ ബെഞ്ച്, ‘ജയിലുകൾ പരിഷ്കരണ സ്ഥാപനങ്ങളാണ്, അല്ലാതെ സിവിൽ സമൂഹത്തിന്റെ സൗകര്യങ്ങൾക്കുള്ള ഇടമല്ല.
അത്യാവശ്യമല്ലാത്തതോ ആഡംബരപരമോ ആയ വസ്തുക്കൾ നൽകാത്തത്, ആരോഗ്യത്തിനോ അന്തസ്സിനോ വ്യക്തമായ ദോഷം വരുത്തുന്നില്ലെങ്കിൽ, ഭരണഘടനാപരമായോ മനുഷ്യാവകാശ ലംഘനമായോ കണക്കാക്കാനാവില്ല,’ എന്ന് നിരീക്ഷിച്ചു. തമിഴ്നാട്ടിലെ ജയിൽ ഭരണത്തിനായി മാർഗ്ഗനിർദ്ദേശങ്ങൾ പുറപ്പെടുവിക്കുന്നതിനിടെ, ഇഷ്ടവിഭവങ്ങൾ നൽകാൻ ജയിൽ അധികാരികൾക്ക് കഴിയാത്തത് സ്ഥാപനപരമായ പരിമിതികൾ കാരണമാണെന്നും ഇത് മനുഷ്യാവകാശ ലംഘനമായി കണക്കാക്കാനാവില്ലെന്നും ബെഞ്ച് വ്യക്തമാക്കി. ജയിൽ സൗകര്യങ്ങൾ തിരുത്തൽപരമായ ആവശ്യങ്ങൾക്കുള്ളതാണെന്നും വ്യക്തിപരമായ സൗകര്യങ്ങൾ നൽകുന്നതിനുള്ളതല്ലെന്നുമുള്ള തത്വം ഈ വിധി ആവർത്തിച്ചുറപ്പിക്കുന്നു.
