മലപ്പുറം: യുവാക്കളെ ജീപ്പിടിച്ചു കൊല്ലാന് ശ്രമിച്ച കേസിലെ പ്രതി പിടിയില്. പൂങ്ങോട് മഠത്തില് പറമ്പ് വിഷ്ണു പ്രസാദ് (30) ആണ് പിടിയിലായത്. പ്രതിക്കെതിരെ വധശ്രമത്തിനടക്കം കേസെടുത്തു. അക്രമത്തില് ഗുരുതര പരിക്കേറ്റ കാവുങ്ങല് പുത്തന്പുരയില് അഭിലാഷ് (28) വണ്ടൂരിലെ സ്വകാര്യ ആശുപത്രിയില് ചികിത്സയിലാണ്. മദ്യലഹരിയില് കാറില് ജീപ്പിടിച്ച് സ്ത്രീകളും കുട്ടികളും ഉള്പ്പെടെയുള്ള യാത്രക്കാരെ തടഞ്ഞുനിര്ത്തി പ്രശ്നങ്ങള് ഉണ്ടാക്കിയ വിഷ്ണുപ്രസാദിനെ യുവാക്കൾ തടഞ്ഞതാണ് പ്രകോപനം. റോഡിലൂടെ വലിച്ചിഴക്കപ്പെട്ട അഭിലാഷിന് തലക്കും കാലിനും പരിക്കുണ്ട്. വാഹനമിടിച്ച സമയത്ത് കൂടെയുണ്ടായിരുന്ന സുഹൃത്ത് മംഗലപറമ്പ് സിറാജുദ്ദീന് (30) അത്ഭുതകരമായാണ് രക്ഷപ്പെട്ടത്.
