തിരുവനന്തപുരം : പോടാ പുല്ലേ… സസ്പെന്ഷനിലായ എസ്.ഐയുടെ വാട്ട്സ് ആപ്പ് സ്റ്റാറ്റസ് വിവാദമാകുന്നു. യുവാവിനു ക്രൂരമര്ദനമേറ്റ സംഭവത്തില് കേസെടുക്കാതെ പ്രതിക്ക് സ്റ്റേഷന് ജാമ്യം നല്കി വിട്ടയച്ചതിനെത്തുടര്ന്നാണ് സസ്പെന്ഷനിലായത്. സസ്പെന്ഷനിലായ മംഗലപുരം എസ്ഐ വി.തുളസീധരന് നായര് തള്ളവിരലുയര്ത്തി നില്ക്കുന്ന ചിത്രത്തിനു താഴെ ‘പോടാ പുല്ലേ’ എന്നെഴുതിയതാണു ചര്ച്ചയായത്. എസ്ഐയെ സസ്പെന്ഡ് ചെയ്തത് ശനിയാഴ്ചയാണ്. അന്നു രാത്രി എട്ടരയ്ക്കാണു സ്റ്റാറ്റസ് അപ്ഡേറ്റ് ചെയ്തത്.
കണിയാപുരം പുത്തന്തോപ്പ് ചിറയ്ക്കല് ആസിയ മന്സിലില് എച്ച്.അനസി (25) നാണു നടുറോഡില് ക്രൂരമര്ദനമേറ്റത്. പരാതി സ്വീകരിക്കാന് എസ്ഐ വിസമ്മതിച്ചതായി അന്വേഷണത്തില് കണ്ടെത്തി. അതേസമയം ക്രിമിനല് പശ്ചാത്തലമുള്ള പ്രതി ഫൈസലിനെ സ്റ്റേഷന് ജാമ്യം നല്കി വിടുകയും ചെയ്തിരുന്നു. മാധ്യമ വാര്ത്തകളെത്തുടര്ന്ന് തിരുവനന്തപുരം മേഖല ഡിഐജി സഞ്ജയ്കുമാര് ഗുരുഡിന് സ്റ്റേഷനില് നേരിട്ടെത്തി അന്വേഷിച്ചാണു നടപടി എടുത്തത്. ഡിവൈഎസ്പി റാങ്കിലുള്ള ഉദ്യോഗസ്ഥന് എസ്ഐക്കെതിരെ വകുപ്പുതല അന്വേഷണം നടത്തണമെന്നും ഡിഐജി നിര്ദേശിച്ചിരുന്നു.
