തിരുവനന്തപുരം : യുഎഇ കോണ്സുലേറ്റിന്റേതായി ആരംഭിച്ച സമാന്തര ബാങ്ക് അക്കൗണ്ട് വഴി സ്വപ്ന സുരേഷും സംഘവും എത്തിച്ചത് 58 കോടിയോളം രൂപ. ഒരേ ബാങ്കില് തന്നെ കോണ്സുലേറ്റിന്റെ പേരില് 6 അക്കൗണ്ടുകള് ഉണ്ട്. ഇത്തരത്തില് ഒരു അക്കൗണ്ടിലാണ് 58 കോടി രൂപ എത്തിയത്. എന്നാല് നിലവില് ഈ അക്കൗണ്ടില് 4 കോടി രൂപ മാത്രമാണ് അവശേഷിക്കുന്നത്. ലൈഫ് മിഷന് പദ്ധതിക്കുള്ള റെഡ് ക്രസന്റിന്റെ സഹായമായ 20 കോടി രൂപയടക്കം എത്തിയത് ഈ അക്കൗണ്ടിലേക്കായിരുന്നു. ഇതില് നിന്നെല്ലാം സഹായം സ്വീകരിച്ച സംഘടനകള് ഇപ്പോള് അന്വേഷണ വിഭാഗത്തിന്റെ നിരീക്ഷണത്തിലാണ്.
ഈ അക്കൗണ്ടില് നിന്നാണ് 14.5 കോടിയാണു വടക്കാഞ്ചേരിയിലെ ഫ്ളാറ്റ് നിര്മാണക്കമ്പനിക്കു കൈമാറിയത്. 4 കോടിയില്പരം രൂപ കമ്മിഷന് ഇനത്തില് സ്വപ്നയും സംഘവും കൈപ്പറ്റിയെന്നാണ് ആരോപിക്കപ്പെട്ടത്. അക്കൗണ്ട് തുടങ്ങാന് വ്യാജരേഖകള് ഉപയോഗിച്ചിരിക്കാമെന്നാണു കരുതുന്നത്. കോണ്സുലേറ്റിന്റെ പേരിലുള്ള വ്യാജസീലും രേഖകളും സ്വര്ണക്കടത്തു കേസിലെ ഒന്നാം പ്രതിയും കോണ്സുലേറ്റ് മുന് പിആര്ഒയുമായ പി.എസ്. സരിതിന്റെ വീട്ടില് നിന്നു പിടിച്ചെടുത്തിരുന്നു.
കേരളത്തിലെ പ്രളയ ശേഷം 2018 ഒക്ടോബറില് സഹായം തേടി മുഖ്യമന്ത്രി പിണറായി വിജയന് യുഎഇ സന്ദര്ശിച്ചിരുന്നു. അന്നു സ്വപ്നയും മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം.ശിവശങ്കറും യുഎഇയില് ഉണ്ടായിരുന്നു. ഇത്തരത്തില് കോണ്സുലേറ്റിലെ സ്വാധീനം മറയാക്കി സ്വപ്ന വിവിധ രാജ്യാന്തര സംഘടനകളില് നിന്നു പ്രളയസഹായം തേടിയെന്നാണു സൂചന.
