തിരുവനന്തപുരം: സ്വിഫ്റ്റ് കമ്പനി രൂപീകരണത്തില് നിന്ന് പിന്മാറണം , ശമ്പളപരിഷ്കരണം നടപ്പാക്കണം എന്നീ ആവശ്യങ്ങളുന്നയിച്ചു ഈ വരുന്ന 23 ന് കെ എസ് ആര് ടി സിയില് പണിമുടക്കിന് ആഹ്വാനം ചെയ്ത് യു ഡി എഫ് അനുകൂല സംഘടന.
സ്വിഫ്റ്റ് കമ്പനി രൂപീകരിക്കുന്നതില് തൊഴിലാളി യൂണിയനുകളുടെ എതിര്പ്പ് മറികടക്കാന് ഒത്തുതീര്പ്പ് നിര്ദേശം ധനമന്ത്രി തോമസ് ഐസക് ഇന്നലെ മുന്നോട്ട് വച്ചിരുന്നു. സ്വിഫ്റ്റ് കമ്പനി രൂപീകരിക്കുന്നതില് യൂണിയനുകള്ക്ക് എതിര്പ്പുണ്ടെങ്കില് അത് പൂര്ണമായും സര്ക്കാര് ഉടമസ്ഥതയില് ഉള്ള സൊസൈറ്റിയാക്കാമെന്നാണ് നിര്ദേശം.
ഗതാഗത മന്ത്രി എ കെ ശശീന്ദ്രന്, കെ എസ് ആര് ടി സി എം ഡി ബിജു പ്രഭാകര് എന്നിവരുമായി യൂണിയന് പ്രതിനിധികള് നടത്തിയ ചര്ച്ചയിലാണ് ധനമന്ത്രി നിര്ദേശം മുന്നോട്ട് വെച്ചത്. പിരിച്ചുവിട്ടവര്ക്ക് പുനപ്രവേശനവും നിലവിലുള്ളവര്ക്ക് തൊഴിലും ശമ്പളവും ഉറപ്പുവരുത്തിയാല് പരിഷ്കരണങ്ങളോട് സഹകരിക്കാമെന്ന് യോഗത്തില് സിഐറ്റിയു അറിയിച്ചു.
