തൃശൂര് : സംസ്ഥാന ജൂനിയര്-സബ് ജൂനിയര് നീന്തല് ചാമ്പ്യന്ഷിപ്പില് 82 ഇനങ്ങള് പൂര്ത്തിയാകുമ്പോള് ജൂനിയര് വിഭാഗത്തില് 365 പോയന്റോടെ തിരുവനന്തപുരവും സബ് ജൂനിയര് വിഭാഗത്തില് 311 പോയന്റോടെ എറണാകുളവും മുന്നേറ്റം തുടരുന്നു. ചാമ്പ്യന്ഷിപ്പിന്റെ രണ്ടാം ദിനത്തില് പുതുതായി അഞ്ച് റെക്കോഡുകള് പിറന്നു. അഞ്ച് റെക്കോഡും എറണാകുളം ജില്ല സ്വന്തമാക്കി. ജൂനിയര് വിഭാഗത്തില് 355 പോയന്റോടെ എറണാകുളമാണ് രണ്ടാം സ്ഥാനത്ത്. 69 പോയന്റോടെ കോട്ടയം മൂന്നാം സ്ഥാനത്തും 65 പോയന്റോടെ പാലക്കാട് നാലാം സ്ഥാനത്തുമുണ്ട്. സബ് ജൂനിയര് വിഭാഗത്തില് 157 പോയന്റോടെ തിരുവനന്തപുരമാണ് രണ്ടാം സ്ഥാനത്ത്. കോട്ടയം (32), പാലക്കാട് (21) മൂന്നും നാലും സ്ഥാനത്തുണ്ട്. സബ് ജൂനിയര് ഗേള്സ് ഗ്രൂപ് അഞ്ച് 50 മീറ്റര് ബട്ടര്ഫ്ലൈ സ്ട്രോക്കില് എറണാകുളത്തിന്റെ ശ്രേയ ബിനില് റെക്കോഡ് കുറിച്ചു. 37:46 സെക്കന്ഡിലാണ് ശ്രേയ ഫിനിഷ് ചെയ്തത്.
പഴയ റെക്കോഡ് സമയം 46:54 സെക്കന്ഡായിരുന്നു. ജൂനിയര് ബോയ്സ് ഗ്രൂപ് രണ്ട് 100 മീറ്റര് ഫ്രീ സ്റ്റൈലില് എറണാകുളത്തിന്റെ എസ്.അഭിനവ് 59:32 സെക്കന്ഡില് നീന്തിയെത്തി റെക്കോഡ് മറികടന്നു. 59:60 ആയിരുന്നു പഴയ റെക്കോഡ്. ജൂനിയര് വിഭാഗം ബോയ്സ് ഗ്രൂപ് രണ്ട് 200 മീറ്റര് ബാക്ക് സ്ട്രോക്കില് നിലവിലുണ്ടായിരുന്ന 2:19:54 മിനിറ്റ് സമയം മറികടന്ന് എറണാകുളത്തിന്റെ ആരോണ് ജെ. തോമസ് 2:18:54 മിനിറ്റിന്റെ പുതിയ റെക്കോഡ് കുറിച്ചു. ജൂനിയര് ഗേള്സ് ഗ്രൂപ് ഒന്ന് 200 മീറ്റര് ബാക്ക് സ്ട്രോക്കില് എറണാകുളത്തിന്റെ സന മാത്യു 2:38:13 മിനിറ്റില് നീന്തിയെത്തി റെക്കോഡ് കുറിച്ചു. 2:41:98 മിനിറ്റാണ് പഴയ റെക്കോഡ്.
ജൂനിയര് വിഭാഗം ഗ്രൂപ് രണ്ട് 200 മീറ്റര് ഇന്റിവിജ്വല് മെഡ്ലേയില് എറണാകുളത്തിന്റെ എസ്.അഭിനവ് 2:29:21 മിനിറ്റില് നീന്തിയെത്തി 2:34:11 മിനിറ്റ് എന്ന പഴയ റെക്കോഡ് മറികടന്നു. ഇതോടെ, ശ്രേയ ബിനില്, ആരോണ് ജെ തോമസ്, സന മാത്യു, എസ്.അഭിനവ് എന്നിവര് റെക്കോഡ് ഡബിള് കിറിച്ചു. മൂന്ന് ദിവസങ്ങളിലായി നടക്കുന്ന ചാമ്പ്യന്ഷിപ് ഞായറാഴ്ച വൈകീട്ട് സമാപിക്കും.
