തുമ്പമൺ: പഞ്ചായത്തിൽ കാട്ടുപന്നികളുടെ ശല്യം വർധിച്ചിട്ടും വനംവകുപ്പും മറ്റ് സർക്കാർവകുപ്പുകളും നടപടിയെടുക്കാത്തതിൽ പ്രതിഷേധിച്ച് തുമ്പമൺ പഞ്ചായത്തിലെ ജനപ്രതിനിധികൾ സമരം നടത്തുമെന്ന് ഗ്രാമപ്പഞ്ചായത്ത് ഭാരവാഹികൾ പത്രസമ്മേളനത്തിൽ പറഞ്ഞു.
ഇതിനുമുന്നോടിയായി വെള്ളിയാഴ്ച റാന്നി ഫോറസ്റ്റ് ഓഫീസിന് മുൻപിൽ പഞ്ചായത്തിലെ മുഴുവൻ ജനപ്രതിനിധികളും നിരാഹാരസമരം നടത്തും. ഇക്കാര്യത്തിൽ ഒരു തീരുമാനമുണ്ടായില്ലെങ്കിൽ പഞ്ചായത്തിലെ മുഴുവൻ കർഷകരെയും ഉൾപ്പെടുത്തി അനിശ്ചിതകാല നിരാഹാര സമരത്തിലേക്ക് കടക്കുമെന്ന് ജനപ്രതിനിധികൾ പറഞ്ഞു.
2019 മുതൽ ലക്ഷക്കണക്കിന് രൂപയുടെ കൃഷിയാണ് കാട്ടുപന്നിയുടെ ആക്രമണത്തിൽ തുമ്പമൺ പഞ്ചായത്തിൽമാത്രം നഷ്ടംവന്നിട്ടുള്ളത് ഈ കർഷകർക്ക് അർഹമായ നഷ്ടപരിഹാരംപോലും നൽകുവാൻ അധികൃതർ തയ്യാറായിട്ടില്ലെന്ന് പഞ്ചായത്ത് പ്രസിഡന്റ് റോണി സക്കറിയ, വൈസ് പ്രസിഡൻറ് അഡ്വ.രാജേഷ്, പഞ്ചായത്തംഗങ്ങളായ ഗിരീഷ് കുമാർ, മോനി ബാബു, ഷിനുമോൾ എബ്രഹാം എന്നിവർ പറഞ്ഞു.