വള്ളിക്കോട് : വള്ളിക്കോട് ഗ്രാമപഞ്ചായത്തിലെ ആമ്പൽപൂഞ്ചിറ ടൂറിസത്തിന്റെ ഭാഗമായി നിർമ്മിച്ച ‘ടേക്ക് എ ബ്രേക്ക്’ പദ്ധതി അവതാളത്തിൽ. ശുചിമുറികളും ലഘുഭക്ഷണശാലയും ഉൾപ്പെടെ പ്രവർത്തിക്കേണ്ടിയിരുന്ന കെട്ടിടം പൂട്ടിയിട്ടിരിക്കുകയാണ്. മുഖ്യമന്ത്രിയുടെ പന്ത്രണ്ടിന പരിപാടിയിൽ 2020-2021 പദ്ധതി പ്രകാരം അനുവദിച്ച ഈ നിര്മ്മാണം 2022 ഓഗസ്റ്റ് 15-നാണ് ഉദ്ഘാടനം ചെയ്തത്. ആമ്പൽപൂഞ്ചിറ പാർക്കിലെത്തുന്ന സന്ദർശകർക്ക് പ്രയോജനകരമാക്കുക എന്ന ലക്ഷ്യത്തോടെയാണ് പദ്ധതി വിഭാവനം ചെയ്തത്.
എന്നാൽ മിനി പാർക്ക് നാശാവസ്ഥയിലായതോടെ ‘ടേക്ക് എ ബ്രേക്ക്’ പദ്ധതിയുടെ പ്രവർത്തനവും നിലച്ചു. ലക്ഷങ്ങൾ മുടക്കി നിർമ്മിച്ച കെട്ടിടം വർഷങ്ങളായി പൂട്ടിയിട്ടിരിക്കുന്നതിനാൽ ഇപ്പോൾ നാശത്തിന്റെ വക്കിലാണ്. പദ്ധതി തുറന്നു പ്രവർത്തിപ്പിക്കാൻ വള്ളിക്കോട് ഗ്രാമപഞ്ചായത്തിന്റെ ഭാഗത്തുനിന്ന് യാതൊരു നടപടിയും ഉണ്ടാകുന്നില്ലെന്നും ആക്ഷേപമുയരുന്നുണ്ട്.
