പത്തനംതിട്ട : തമിഴ് ബാലികയെ രണ്ടാനച്ഛന് ലൈംഗികമായി പീഡിപ്പിച്ച് കൊലപ്പെടുത്തിയെന്ന കേസില് വിചാരണ തുടങ്ങി. നടന്നത് അതിക്രൂരപീഡനമെന്നാണ് കുറ്റപത്രത്തിലുള്ളത്. പത്തനംതിട്ട അഡീഷണല് ജില്ലാ ആന്ഡ് സെഷന്സ് കോടതിയാണ് കേസ് പരിഗണിക്കുന്നത്. കുറ്റപത്രം വായിച്ചുകേട്ട പ്രതി അലക്സ് എല്ലാം നിഷേധിച്ചു. അഞ്ച് വയസ്സുള്ളതും 109 സെ.മീ. ഉയരമുള്ളതുമായ കുഞ്ഞിന്റെ ശരീരത്തില് 66 മുറിവുകളാണുണ്ടായിരുന്നത്. ലൈംഗികാതിക്രമം കൂടാതെ കുട്ടിയുടെ തല ഭിത്തിയില് ശക്തമായി ഇടിപ്പിച്ച് തലയോട്ടി പൊട്ടിക്കുകയും ചെയ്തതായി കുറ്റപത്രത്തില് പറയുന്നു. കഴിഞ്ഞ വര്ഷം ഏപ്രില് അഞ്ചിനായിരുന്നു കൊലപാതകം.
ലഹരിക്ക് അടിമയായിരുന്ന പ്രതി ഭാര്യയുടെ ആദ്യ ബന്ധത്തിലുള്ള കുഞ്ഞിനെ ഒഴിവാക്കുക എന്ന ഉദ്ദേശ്യത്തോടെയാണ് ഇഞ്ചിഞ്ചായി കൊന്നതെന്നാണ് കണ്ടെത്തല്. തെങ്കാശിയില്നിന്ന് ജോലിക്കായി കുമ്പഴയിലെത്തി വാടയ്ക്ക് താമസിക്കുകയായിരുന്നു കുട്ടിയുടെ കുടുംബം. വീട്ടുജോലിക്ക് പോയ അമ്മ മടങ്ങിയെത്തിയപ്പോഴാണ് ചലനമറ്റ നിലയില് കുഞ്ഞിനെ കണ്ടത്. ജനറല് ആശുപത്രിയില് മരണം സ്ഥിരീകരിച്ചു.
അന്ന് വൈകുന്നേരം കസ്റ്റഡിയിലെടുത്ത പ്രതി അലക്സ് രാത്രി പോലീസ് സ്റ്റേഷനില്നിന്ന് കടന്നു. ലഹരിക്ക് അടിമയായ ഇയാളെ പിറ്റേന്ന് പുലര്ച്ചെ കുമ്പഴയില്നിന്ന് നാട്ടുകാരുടെ സഹായത്തോടെയാണ് പോലീസ് പിടികൂടിയത്. കേസില് കുട്ടിയുടെ അമ്മയടക്കം 39 സാക്ഷികളുണ്ട്. അഡ്വ.നവീന് എം.ഈശോയാണ് പബ്ലിക് പ്രോസിക്യൂട്ടര്. കേസ് അടുത്ത മാസം 13-ന് പരിഗണിക്കും.
