ജയ്പൂര് : ടാങ്കറുമായി കൂട്ടിയിടിച്ച് സ്വകാര്യ ബസിന് തീപിടിച്ച് 12 പേര്ക്ക് ദാരുണാന്ത്യം. രാജസ്ഥാനിലെ ബാര്മര് -ജോധ്പൂര് ദേശീയപാതയില് ബുധനാഴ്ച രാവിലെയാണ് സംഭവം. ബസില് 25ഓളം പേര് ഉണ്ടായിരുന്നതായാണ് വിവരം. മരിച്ചവര് ബസിലുണ്ടായിരുന്നവരാണെന്നാണ് പ്രാഥമിക വിവരം. 10 പേരെ ബസില് നിന്നും രക്ഷപ്പെടുത്തിയതായി പോലീസ് അറിയിച്ചു. ജില്ല അധികൃതരും പോലീസും സ്ഥലത്തെത്തിയായിരുന്നു രക്ഷാപ്രവര്ത്തനം നടത്തിയത്.
സംഭവത്തില് മന്ത്രി സുഖ്റാം വിഷ്ണോയി, പച്പദ്ര എം.എല്.എ മദന് പ്രജാപത്, ഡിവിഷനല് കമ്മീഷണര് ഉള്പ്പെടെയുള്ളവര് സംഭവ സ്ഥലത്തെത്തി സ്ഥിതിഗതികള് നിരീക്ഷിച്ചു. അപകടത്തെ തുടര്ന്ന് ദേശീയപാതയില് ഗതാഗതം തടസപ്പെട്ടു. രാവിലെ 9.55ഓടെ ബലോത്രയില് നിന്ന് പുറപ്പെട്ട ബസാണ് അപകടത്തില്പ്പെട്ടത്. എതിര്ദിശയിലെത്തിയ ടാങ്കര് ബസുമായി കൂട്ടിയിടിച്ച് ബസിന് തീപിടിക്കുകയായിരുന്നുവെന്നുമാണ് വിവരം .