തണ്ണിത്തോട് : തണ്ണിത്തോട് പ്ലാന്റെഷന് എസ്റ്റേറ്റ് മേടപ്പാറ ഡിവിഷനില് ടാപ്പിംഗ് തൊഴിലാളികള്ക്ക് തേനീച്ചയുടെ കുത്തേറ്റു. പതിനഞ്ചോളം ആളുകള്ക്ക് ആണ് കുത്തേറ്റത്. ഇതില് ഗുരുതരമായി കുത്തേറ്റ തേക്കുതോട് സ്വദേശി രാധിക, മേടപ്പാറ സ്വദേശി ബിന്ദു, ആട്ടച്ചാക്കല് സ്വദേശി സുമ, തേക്കുതോട് സ്വദേശികളായ ലത, ഉഷ, തണ്ണിത്തോട് സ്വദേശി ബീന എന്നിവരെ തണ്ണിത്തോട് കുടുംബാരോഗ്യ കേന്ദ്രത്തില് എത്തിച്ച് പ്രാഥമിക ചികിത്സ നല്കിയ ശേഷം കോന്നി മെഡിക്കല് കോളേജ് ആശുപത്രിയില് പ്രവേശിപ്പിച്ചു.
രാവിലെ പത്ത് മണിയോടെ ആണ് സംഭവം. കാട് തെളിക്കുന്ന ജോലികള്ക്ക് ഇടയിലാണ് തേനീച്ച കുത്തിയത്. പ്രധാന റോഡില് നിന്ന് കുറച്ച് ഉള്ളില് ആയിരുന്നു തൊഴിലാളികള് നിന്നിരുന്നത്. സംഭവത്തെ തുടര്ന്ന് പ്ലാന്റെഷന് വാഹനത്തില് കയറ്റി ഇവരെ ആശുപത്രിയില് എത്തിക്കുകയായിരുന്നു.
