ന്യൂഡല്ഹി: രാജ്യത്തെ പ്രമുഖ കമ്പനിയായ ടാറ്റ കപ്പല് നിര്മാണത്തിലേക്കും ചുവടുവെക്കുന്നു. ഇതിന്റെ ഭാഗമായി കേരളത്തില് വന് നിക്ഷേപത്തിനാണ് ടാറ്റ ഗ്രൂപ്പ് ഒരുങ്ങുന്നത്. ഏകദേശം 1 ബില്യണ് ഡോളര് നിക്ഷേപിക്കാനാണ് ടാറ്റ ഗ്രൂപ്പ് പദ്ധതി.മുഖ്യമന്ത്രി വിഡി സതീശനാണ് പദ്ധതി സംബന്ധിച്ച് വെളിപ്പെടുത്തിയത്. ബ്ലുംബെര്ഗിന് നല്കിയ അഭിമുഖത്തിലാണ് വിഡി സതീശന്റെ പരാമര്ശം. ഇക്കണോമിക് ടൈംസാണ് വാര്ത്ത റിപ്പോര്ട്ട് ചെയ്തത്. കപ്പല് നിര്മാണത്തില് നിക്ഷേപിക്കാന് ടാറ്റ ഒരുങ്ങുകയാണ്. ഇതിന് വേണ്ട ഭൂമി ഉള്പ്പടെയുള്ള സൗകര്യങ്ങള് സര്ക്കാര് നല്കും. പദ്ധതിക്ക് സംസ്ഥാന സര്ക്കാര് അനുകൂലമാണ്. ഒരു മാസത്തിനുള്ളില് ഇതിന്റെ നടപടികള് പൂര്ത്തിയാക്കുമെന്നും വിഡി സതീശന് പറഞ്ഞു.
കാപ്പിയില് തുടങ്ങി ആഡംബര ഓട്ടോമൊബൈല് ഉല്പന്നങ്ങള് വരെ ടാറ്റ നിര്മിക്കുന്നുണ്ട്. എങ്കിലും ഇതുവരെയായിട്ടും കമ്പനി സ്വതന്ത്രമായി കപ്പല് നിര്മിച്ചിട്ടില്ല. അതേസമയം, ഇതുമായി ബന്ധപ്പെട്ട് പ്രതികരണം നടത്താന് ടാറ്റ ഗ്രൂപ്പ് ഇതുവരെ തയാറായിട്ടില്ല. കപ്പല്നിര്മാണ ശേഷി വലിയ രീതിയില് ഉയര്ത്താനുള്ള നീക്കങ്ങളുമായി ഇന്ത്യ മുന്നോട്ട് പോവുന്നതിനിടയിലാണ് ടാറ്റയുടെ നിക്ഷേപവാര്ത്തയും പുറത്തുവരുന്നത്. കപ്പല് നിര്മാണം വ്യാപിപ്പിക്കാനായി ദക്ഷിണകൊറിയയുമായി സഹകരിക്കാനും ഇന്ത്യ തീരുമാനമെടുത്തിരുന്നു. കേരളത്തിലെ പ്രധാന തുറമുഖങ്ങളായ കൊച്ചി, വിഴിഞ്ഞം എന്നിവയോട് ചേര്ന്ന് കപ്പല്നിര്മാണശാലകളും റിപ്പയറിങ് കേന്ദ്രങ്ങളും സ്ഥാപിക്കാന് തീരുമാനിച്ചിട്ടുണ്ട്. ഇതിന്റെ ഭാഗമായാണ് ടാറ്റയുടേയും നിക്ഷേപം.
