പത്തനംതിട്ട : ചിറ്റാര് – വടശേരിക്കര റോഡില് മണിയാര് പോലീസ് ക്യാമ്പിന് സമീപം ഭാരം കയറ്റി വന്ന ടോറസ് ലോറി നിയന്ത്രണം വിട്ടു മറിഞ്ഞു. ആര്ക്കും പരിക്കില്ല. ഇന്ന് രാവിലെയായിരുന്നു സംഭവം. ചിറ്റാറിലെ പാറമടയില് നിന്നും ഭാരം കയറ്റി വന്ന ലോറിയാണ് മറിഞ്ഞത്. കുറച്ചു നാളുകള്ക്ക് മുന്പും ഈ ഭാഗത്ത് ലോറി മറിഞ്ഞിരുന്നു. പാറമടയില് നിന്നും പാറയും പാറ ഉത്പന്നങ്ങളും കയറ്റി പോകുന്ന ഇത്തരം ലോറികള് അമിത വേഗത്തിലാണ് ഈ വഴി ചീറിപ്പായുന്നത് എന്നാണ് നാട്ടുകാരുടെ ആരോപണം.
ഇത്തരം ലോറികള്ക്ക് എതിരെ നടപടി സ്വീകരിക്കുവാന് ബന്ധപ്പെട്ട വകുപ്പുകളും തയ്യാറായിട്ടില്ല. വലിയ കയറ്റവും വളവുകളും ഉള്ള ചിറ്റാര് വടശേരിക്കര റോഡില് സഞ്ചരിക്കുന്ന വാഹന യാത്രക്കാര്ക്ക് ഭീഷണിയായി മാറുകയാണ് ഓവര് ലോഡുമായി അമിത വേഗത്തില് വരുന്ന ഈ വാഹനങ്ങള് . ചിറ്റാര് – വടശേരിക്കര റോഡിലും സീതത്തോട് – ചിറ്റാര് റോഡിലും ടിപ്പര് ലോറി അപകടങ്ങള് പതിവായിട്ടും യാതൊരു നടപടികളും സ്വീകരിക്കുവാന് അധികാരികള് തയ്യാറായിട്ടില്ല.
