തിരുവനന്തപുരം: സര്വകലാശാല വിഷയത്തില് സര്ക്കാരിന് പ്രതിരോധം തീര്ത്ത് പുതിയ നീക്കവുമായി ഗവര്ണര് ആരിഫ് മുഹമ്മദ് ഖാന്. സാങ്കേതിക സര്വകലാശാല വിസിക്കായി സര്ക്കാര് നിര്ദേശിച്ച പേരുകള് തള്ളി ചാന്സിലറായ ഗവര്ണര് ഡോ. സിസ തോമസിന് കെടിയു വിസിയുടെ ചുമതല നല്കി. പുതിയ വിസിയെ നിയമിക്കുന്നത് വരെയാണ് ചുമതല. സാങ്കേതിക വിദ്യാഭ്യാസ വകുപ്പിലെ സീനിയര് ജോയിന്റ് ഡയറക്ടറാണ് സിസ തോമസ്.
വൈസ് ചാന്സലര് ആയിരുന്ന ഡോക്ടര് രാജശ്രീയെ യുജിസി യോഗ്യത ഇല്ലെന്ന് വ്യക്തമാക്കി സുപ്രീംകോടതി നേരത്തെ പുറത്താക്കിയിരുന്നു. ജസ്റ്റിസ് എം.ആര്.ഷാ അധ്യക്ഷനായ ബെഞ്ചാണ് നിയമനം റദ്ദാക്കിയത്. കൊച്ചി ശാസ്ത്ര സാങ്കേതിക സര്വകലാശാല മുന് ഡീന് പി.എസ്.ശ്രീജിത്തിന്റെ പരാതിയിലായിരുന്നു സുപ്രീംകോടതിയുടെ നടപടി.
