തിരുവനന്തപുരം : മാര്ച്ച്, ഏപ്രില്, മെയ് മാസങ്ങളാണ് കേരളത്തില് വേനല്ക്കാലമായി കണക്കാക്കുന്നത്. എന്നാല് വേനലെത്തും മുമ്പേ കേരളം ചുട്ടുപൊള്ളുകയാണ്. ആലപ്പുഴ, കോട്ടയം, കണ്ണൂര്, കാസര്കോട് ജില്ലകളില് ഇന്ന് ഉയര്ന്ന താപനിലയില് ശരാശരി 2 മുതല് 4 ഡിഗ്രി വരെ വര്ദ്ധന ഉണ്ടായേക്കുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു. ഇന്നലെ ആലപ്പുഴയിലും കോട്ടയത്തും ശരാശരിയിലും 3 ഡിഗ്രി ചൂട് കൂടിയിരുന്നു.
താപനില കൂടുന്ന സാഹചര്യത്തില് സൂര്യാഘാതം, സൂര്യാതപം എന്നിവ ഒഴിവാക്കാനായി ജാഗ്രത പാലിക്കണമെന്ന് ദുരന്ത നിവാരണ അതോറിറ്റി മുന്നറിയിപ്പ് നല്കിയിട്ടുണ്ട്. ഉച്ചക്ക് 12 മുതല് വൈകിട്ട് 3 വരെയുള്ള സമയത്ത് വെയില് കൊള്ളുന്ന സാഹചര്യം ഒഴിവാക്കണമെന്നും നിര്ദ്ദേശമുണ്ട്. ഒരാഴ്ചക്കു ശേഷം സംസ്ഥാനത്ത് ചെറിയ മഴക്ക് സാധ്യതയുണ്ടെങ്കിലും ചൂടില് ഗണ്യമായ കുറവിന് സാധ്യതയില്ലെന്നാണ് കാലാവസ്ഥ നിരീക്ഷണ കേന്ദ്രത്തിന്റെ വിലയിരുത്തല്.
