കണ്ണൂര്: സ്ഥാനാര്ഥിയുടെ നാമനിര്ദ്ദേശ പത്രിക തള്ളിപ്പോയ തലശേരി മണ്ഡലത്തില് പ്രവര്ത്തകരോട് മനഃസാക്ഷി വോട്ടിന് ആഹ്വാനം ചെയ്ത് ബിജെപി. സ്വതന്ത്ര സ്ഥാനാര്ഥി സി.ഒ.ടി നസീര് പിന്തുണ നിരസിച്ച സാഹചര്യത്തിലാണ് ബിജെപി ജില്ലാ നേതൃത്വം നിലപാട് വ്യക്തമാക്കിയത്.
കോണ്ഗ്രസ് -സിപിഎം പാര്ട്ടികള് നേതൃത്വം നല്കുന്ന മുന്നണികള്ക്ക് വോട്ടു ചെയ്യില്ല. തലശേരിയില് ഒട്ടേറെ ബലിദാനികളുണ്ടായത് സിപിഎമ്മിന്റെ അക്രമ രാഷ്ട്രീയം കൊണ്ടാണ്. അതിനാല് സിപിഎമ്മിനെ എതിര്ക്കുകയെന്നതാണ് നയം. ബിജെപിയുടെ അക്കൗണ്ട് പൂട്ടിക്കാനുള്ള കോണ്ഗ്രസ് സിപിഎം നീക്കത്തിന്റെ ഫലമായാണ് തലശേരിയില് എന്ഡിഎ സ്ഥാനാര്ഥിയുടെ പത്രിക തള്ളിയത്. സി.ഒ.ടി നസീര് ഇങ്ങോട്ട് വന്നിട്ടാണ് എന്ഡിഎയുടെ പിന്തുണ തേടിയതെന്നും ബിജെപി നേതൃത്വം അറിയിച്ചു.
