എടത്വ : തലവടിയിലെ വള്ളംകളി പ്രേമികളുടെ ചിരകാല അഭിലാഷമായ ‘തലവടി ചുണ്ടന്’ സ്വപ്ന സാക്ഷാത്കാരത്തിലേക്ക്. ‘തലവടി ചുണ്ടന് ‘ നിര്മ്മിക്കുന്നതിന് ആവശ്യമായ തടികള് മുറിക്കുന്ന ജോലികള് പുരോഗമിക്കുന്നു.120-ല് അധികം വര്ഷം പഴക്കമുള്ള ആഞ്ഞിലി തടിയാണ് കോട്ടയം ജില്ലയില് കുറുവിലങ്ങാട്ട് നിന്നും തലവടി ചുണ്ടന് നിര്മ്മിക്കുന്നതിന് തലവടിയില് എത്തിക്കുന്നത്.
തലവടി ചുണ്ടന് സമിതി പ്രസിഡന്റ് കെ.ആര് ഗോപകുമാര് ഏപ്രില് 3ന് 3മണിക്ക് മാലിപ്പുരയുടെ കാല്നാട്ട് കര്മ്മം നിര്വഹിക്കും. ജനറല് കണ്വീനര് അഡ്വ.സി.പി സൈജേഷ് അധ്യക്ഷത വഹിക്കും. നീരേറ്റുപ്പുറം പമ്പ ബോട്ട് റേസ് ഫിനിഷിംഗ് പോയിന്റിന് സമീപമമുള്ള ഡോ.സണ്ണിയുടെ പുരയിടത്തിലാണ് താത്ക്കാലിക മാലിപ്പുര നിര്മ്മിക്കുന്നത്. ഉള്വശം 130 അടി നീളവും 12 അടി വീതിയും ലഭിക്കത്തക്ക നിലയിലാണ് മാലിപ്പുര നിര്മ്മിക്കുന്നത്. ചുണ്ടന് വള്ളം നിര്മ്മാണം പൂര്ത്തിയാകുന്നതോടുകൂടി സ്വന്തമായി വസ്തു വാങ്ങി മാലിപ്പുര നിര്മ്മിക്കുവാനാണ് വള്ളസമിതിയുടെ ലക്ഷ്യം.
തലവടി ചുണ്ടന്റെ ശില്പി കോയില്മുക്ക് സാബു ആചാരിയെ ട്രഷറാര് പി.ഡി രമേശ് കുമാര്, ജനറല് സെക്രട്ടറി ജോമോന് ചക്കാലയില് എന്നിവര് ചേര്ന്ന് ചടങ്ങില് ആദരിക്കും.
