റാങ്ക് ലിസ്റ്റ്
പത്തനംതിട്ട ജില്ലയില് പൊതുമരാമത്ത് (ഇലക്ട്രിക്കല് വിംഗ്) വകുപ്പില് ലൈന്മാന് തസ്തികയില് (എസ്.ടി വിഭാഗത്തിന് മാത്രമുളള സ്പെഷ്യല് റിക്രൂട്ട്മെന്റ് ) 19000-43600 രൂപ ശമ്പള സ്കെയിലില് 19.01.2021 ല് നടന്ന ഒ.എം.ആര് ടെസ്റ്റിന്റെ 23.03.2022 പ്രാബല്യത്തിലുളള റാങ്ക് ലിസ്റ്റ് പ്രസിദ്ധീകരിച്ചതായി പത്തനംതിട്ട ജില്ലാ പി.എസ്.സി ഓഫീസര് അറിയിച്ചു. ഫോണ് : 0468 2222665.
കോന്നി താലൂക്ക് വികസന സമിതി യോഗം
കോന്നി താലൂക്ക് വികസന സമിതിയുടെ യോഗം ഏപ്രില് അഞ്ചിന് രാവിലെ 10 ന് കോന്നി താലൂക്ക് ഓഫീസില് ചേരും. താലൂക്ക് വികസന സമിതിഅംഗങ്ങളായ എല്ലാ ജനപ്രതിനിധികളും ഓഫീസ് മേധാവികളും യോഗത്തില് പങ്കെടുക്കണമെന്ന് കോന്നി തഹസില്ദാര് അറിയിച്ചു.
ഐഎച്ച്ആര്ഡി ടെക്നിക്കല് ഹയര് സെക്കന്ഡറി സ്കൂള് എട്ടാം സ്റ്റാന്ഡേര്ഡ് പ്രവേശനം
ഇന്സ്റ്റിറ്റ്യൂട്ട് ഓഫ് ഹ്യുമന് റിസോഴ്സസ് ഡവലപ്മെന്റിന്റെ കീഴില് മല്ലപ്പള്ളി (0469 – 2680574)യില് പ്രവര്ത്തിക്കുന്ന ടെക്നിക്കല് ഹയര്സെക്കന്ററി സ്കൂളില് 2022-23 അധ്യയന വര്ഷത്തില് എട്ടാം സ്റ്റാന്ഡേര്ഡ് പ്രവേശനത്തിന് അര്ഹരായവരില് നിന്നും ഓണ്ലൈനായി അപേക്ഷ ക്ഷണിച്ചു. അപേക്ഷകന് /അപേക്ഷക 01.06.2022നു 16 വയസ് തികയരുത്. ഹൈസ്കൂള് പഠനത്തിനുശേഷം സാങ്കേതിക വിദ്യാഭ്യാസ മേഖലയില് ഉപരിപഠനത്തിന് തയാറാക്കുന്ന തരത്തിലാണ് ഐഎച്ച്ആര്ഡിയുടെ കീഴിലുള്ള ടെക്നിക്കല് ഹൈസ്കൂള് കരിക്കുലം. ഭാവിയില് ഉദ്യോഗ കയറ്റത്തിനും തൊഴിലിനും സാധ്യത കൂട്ടുന്നതിനായി ഇലക്ട്രോണിക്സ് ട്രേഡ് സര്ട്ടിഫിക്കറ്റ് ഇതോടൊപ്പം നല്കുന്നുണ്ട്. സാങ്കേതിക വിദ്യാഭ്യാസ വകുപ്പിന് കീഴിലെ ടെക്നിക്കല് സ്കൂളുകളില് നിന്ന് വ്യത്യസ്തമായി ബയോളജി ഒരു വിഷയമായി പഠിക്കുന്നതിനാല് വൈദ്യശാസ്ത്ര മേഖലയിലെ ഉപരിപഠനം ലക്ഷ്യമിടുന്നവര്ക്കും എഞ്ചിനീയറിംഗ് മേഖല തെരഞ്ഞെടുക്കുന്നവര്ക്കും ഒരുപോലെ ഉപയോഗപ്രദമാണ് ഐഎച്ച്ആര്ഡിയുടെ ടെക്നിക്കല് സ്കൂളുകള്.
സംസ്ഥാനത്തെ പോളിടെക്നിക് കോളജുകളിലെ പ്രവേശനത്തിന് 10 ശതമാനം സംവരണവുമുണ്ട്. ഈ സ്കൂളുകളിലെ അധ്യയന മാധ്യമം ഇംഗ്ലീഷ് ആണ്. ഏഴാം സ്റ്റാന്ഡേര്ഡോ തത്തുല്യ പരീക്ഷയോ പാസായവര്ക്കും പരീക്ഷാഫലം കാത്തിരിക്കുന്നവര്ക്കും അപേക്ഷിക്കാം. അപേക്ഷകള് ihrd.kerala.gov.in/ths എന്ന വെബ്സൈറ്റ് മുഖേന ഓണ്ലൈനായി സമര്പ്പിക്കണം. അപേക്ഷയുടെ രജിസ്ട്രേഷന് ഫീസായി 110 രൂപ (എസ്.സി/എസ്.റ്റി വിദ്യാര്ഥികള്ക്ക് 55 രൂപ) അപേക്ഷിക്കാന് ഉദ്ദേശിക്കുന്ന സ്കൂളിന്റെ ബാങ്ക് അക്കൗണ്ടില് അടച്ച്, പണമടച്ചതിന്റെ വിശദാംശങ്ങള് ഓണ്ലൈന് പോര്ട്ടലില് രേഖപ്പെടുത്താം. അപേക്ഷാ ഫീസ് ബന്ധപ്പെട്ട സ്കൂള് ഓഫീസില് പണമായോ, പ്രിന്സിപ്പലിന്റെ പേരില് മാറാവുന്ന ഡിഡി ആയോ നല്കാം. 2022-23 വര്ഷത്തെ പ്രോസ്പെക്ടസ് ഇതേ വെബ്സൈറ്റില് ലഭ്യമാണ്. അപേക്ഷകള് ഓണ്ലൈനായി ഏപ്രില് 18 ന് വൈകുന്നേരം നാലു വരെ സമര്പ്പിക്കാം.
അസിസ്റ്റന്റ് പ്രൊഫസര് ഇന് ബിസിനസ് ഇക്കണോമിക്സ് ഒഴിവ്
കേരള സര്ക്കാര് സ്ഥാപനമായ ഐഎച്ച്ആര്ഡിയുടെ കീഴില് പ്രവര്ത്തിക്കുന്ന അടൂര് എഞ്ചിനീയറിംഗ് കോളജില് അസിസ്റ്റന്റ് പ്രൊഫസര് ഇന് ബിസിനസ് ഇക്കണോമിക്സ് തസ്തികയിലേയ്ക്ക് താല്ക്കാലിക അടിസ്ഥാനത്തില് (മണിക്കൂര് അടിസ്ഥാനത്തില്) ഒഴിവുണ്ട്. യോഗ്യതയുള്ളവര് അസല് സര്ട്ടിഫിക്കറ്റുകള് സഹിതം ഏപ്രില് ആറിന് രാവിലെ 10.30ന് കോളജ് ഓഫീസില് ഹാജരാകണം. യോഗ്യത : യു.ജി.സി ചട്ടപ്രകാരമുള്ള യോഗ്യത. യു.ജി.സി യോഗ്യത ഉള്ളവരുടെ അഭാവത്തില് മറ്റുള്ളവരെയും പരിഗണിക്കും. വെബ് സൈറ്റ് : www.cea.ac.in , ഫോണ് 04734 – 231995.
ചങ്ങാതി-സര്വേ ഏപ്രില് 3
അതിഥി തൊഴിലാളികളെ മലയാള ഭാഷയില് സാക്ഷരരാക്കുന്നതിനായി ജില്ലാ സാക്ഷരതാ മിഷനും റാന്നി അങ്ങാടി ഗ്രാമപഞ്ചായത്തും ചേര്ന്നു നടത്തുന്ന ചങ്ങാതി പദ്ധതിയുടെ ഭാഗമായി ഇന്ന് സാക്ഷരതാ സര്വേ നടക്കും. റാന്നി അങ്ങാടി ഗ്രാമപഞ്ചായത്തിലെ അതിഥി തൊഴിലാളികളിലെ നിരക്ഷരരെ കണ്ടെത്തുന്നതിനാണ് സര്വേ. ഇതര സംസ്ഥാന തൊഴിലാളികളുടെ അടിസ്ഥാന വിവരങ്ങള്, മാതൃഭാഷയിലും മലയാള ഭാഷയിലുമുള്ള അടിസ്ഥാന സാക്ഷരത, വിദ്യാഭ്യാസ യോഗ്യത, സാക്ഷരതാ പരിപാടിയില് പങ്കെടുക്കുന്നതിനുള്ള സന്നദ്ധത തുടങ്ങിയ വിവരങ്ങളാണ് സര്വേയിലൂടെ ശേഖരിക്കുന്നത്.
പരിശീലനം നേടിയ വോളണ്ടിയര്മാരാണ് സര്വേ നടത്തുന്നത്. റാന്നി എം എസ് എച്ച്എസ്എസിലെ പത്താംതരം, ഹയര് സെക്കന്ഡറി തുല്യതാ പഠിതാക്കള്, കായംകുളം എംഎസ്എം കോളജിലെ എന്എസ്എസ് യൂണിറ്റ് വിദ്യാര്ഥികള്, സാക്ഷരതാ തുടര് വിദ്യാഭ്യാസ പ്രവര്ത്തകര്, സന്നദ്ധ പ്രവര്ത്തകര് തുടങ്ങിയവരാണ് സര്വേ വോളണ്ടിയര്മാര്. ഏപ്രില് മൂന്നിന് രാവിലെ 10ന് റാന്നി അങ്ങാടി ബംഗ്ലാം കടവ് ഉപാസനാ തിയേറ്റര് അങ്കണത്തില് ആരംഭിക്കുന്ന സര്വേ ജില്ലാ പഞ്ചായത്ത് പ്രസിഡന്റ് അഡ്വ. ഓമല്ലൂര് ശങ്കരന് ഉദ്ഘാടനം ചെയ്യും. റാന്നി അങ്ങാടി ഗ്രാമപഞ്ചായത്ത് പ്രസിഡന്റ് അഡ്വ.ബിന്ദു റജി അധ്യക്ഷത വഹിക്കുന്ന ചടങ്ങില് ജനപ്രതിനിധികള്, സാക്ഷരതാ തുടര് വിദ്യാഭ്യാസ പ്രവര്ത്തകര് പങ്കെടുക്കുമെന്ന് സാക്ഷരതാ മിഷന് ജില്ലാ കോ-ഓര്ഡിനേറ്റര് അറിയിച്ചു.
