കോന്നി : കഴിഞ്ഞദിവസം ഉണ്ടായ കനത്ത മഴയിലും കാറ്റിലും തണ്ണിത്തോട് – ചിറ്റാർ റോഡിലേക്ക് ഒടിഞ്ഞ് വീണ മുൾപ്പടർപ്പുകൾ ഗതാഗത തടസം സൃഷ്ടിക്കുന്നു. ചിറ്റാർ റോഡിൽ നെടുംതാരയ്ക്ക് സമീപത്തായാണ് ഇഞ്ചമുൾപടർപ്പകൾ അടക്കം റോഡിലേക്ക് ഒടിഞ്ഞ് വീണത്. ബസുകളും മറ്റ് വലിയ വാഹനങ്ങളും കടന്ന് പോയിരുന്ന റോഡില്ക്കൂടി ഇപ്പോള് ഓട്ടോറിക്ഷകൾക്ക് മാത്രമേ സുഗമമായി കടന്നുപോകുവാന് കഴിയൂ.
ആഴ്ച്ചകളോളമായി മുള്ളുകൾ റോഡിൽ കിടക്കാൻ തുടങ്ങിയിട്ട്. മാത്രമല്ല നെടുംതാരയുടെ ഭാഗത്ത് വളവും കയറ്റവും ഉള്ളതിനാൽ കയറ്റം കയറി വരുന്ന വാഹനങ്ങൾ മുൾപ്പടർപ്പുകൾ റോഡിൽ കിടക്കുന്നതിനാൽ അപകടത്തിൽ പെടുന്നതിനും സാധ്യതയേറെയാണ്. മാത്രമല്ല വർഷങ്ങളായി നെടുംതാരയിലാണ് ആനത്താരയുള്ളതും, ലോക്ഡൌൺ ആയതോടെ വാഹനങ്ങൾ കുറവായത് മൂലം കാട്ടാനയും മറ്റും ഈ വളവിൽ നിന്നാൽ അടുത്ത് എത്തിയതിന് ശേഷം മാത്രമാകും വാഹനയാത്രക്കാരുടെ ശ്രദ്ധയിൽ പെടുക. ഇതും അപകട സാധ്യത വർധിപ്പിക്കുന്നു.
