പട്ന : ഗംഗാനദിയില് ബോട്ട് ഹൈ ടെന്ഷന് വൈദ്യുത ലൈനില് തട്ടി നിരവധി പേര്ക്ക് പരിക്കേറ്റു. ബിഹാറിലെ വൈശാലിയിലാണ് സംഭവം. ബോട്ടില് ഉണ്ടായിരുന്ന 150 ഓളം പേരില് ഏകദേശം 20 പേരെ കാണാതായതായാണ് വിവരം.
പട്നയിലെ കച്ചി ദര്ഗ ഘട്ടില് നിന്ന് വൈശാലിയിലെ രഘോപൂരിലേക്ക് ശനിയാഴ്ച രാത്രി എട്ടു മണിയോടെയാണ് ബോട്ട് പുറപ്പെട്ടത്. യാത്ര തുടങ്ങി അരമണിക്കൂറിനകം ബോട്ട് അപകടത്തില്പ്പെടുകയായിരുന്നു. രാവിലെ മൊകാമയിലും പട്നയിലുമെത്തി തൊഴിലെടുത്തശേഷം വൈകിട്ട് വീട്ടിലേക്ക് മടങ്ങുന്ന ദിവസ വേതനക്കാരാണ് ബോട്ടിലുണ്ടായിരുന്നവരില് കൂടുതല് പേരും.
നദിയുടെ നടുക്കെത്തിയപ്പോള് ബോട്ട് ഹൈ ടെന്ഷന് വൈദ്യുത ലൈനില് തട്ടുകയായിരുന്നു. ബോട്ടിലുണ്ടായിരുന്ന 35ല് അധികം പേര്ക്ക് പൊള്ളലേറ്റു. നിരവധി പേര് നദിയില് മുങ്ങിപ്പോയി. ദിവസങ്ങളായി കരകവിഞ്ഞ് ഒഴുകുകയാണ് ഗംഗ നദി. പട്നയിലെ ഗ്രാമീണ മേഖലയിലെ 2.74ലക്ഷം പേരെ ഇത് ബാധിച്ചിരുന്നു. അപകടത്തെ തുടര്ന്ന് വൈശാലിയില്നിന്നും പട്നയില്നിന്നും അധികൃതര് സംഭവ സ്ഥലത്തെത്തി രക്ഷാപ്രവര്ത്തനം ആരംഭിച്ചു. പരിക്കേറ്റവര് വിവിധ ആശുപത്രികളില് ചികിത്സയിലാണ്.
