ഇടുക്കി : കൊളുക്കുമലയിൽ കൊക്കയിലേക്ക് ചാടിയ വിനോദസഞ്ചാരിയുടെ മൃതദേഹം കണ്ടെത്തി. ചെന്നൈ സ്വദേശിയായ ദ്രവിനീഷ് (25) ആണ് മരിച്ചത്. ഇന്ന് രാവിലെയാണ് നാടിനെ നടുക്കിയ ഈ സംഭവം ഉണ്ടായത്. ട്രക്കിങ്ങിനായി എത്തിയ ദ്രവിനീഷ്, കൂടെയുണ്ടായിരുന്നവർക്കൊപ്പം നിൽക്കുന്നതിനിടെ പെട്ടെന്ന് മുന്നോട്ട് ഓടി വലിയ താഴ്ചയിലേക്ക് ചാടുകയായിരുന്നുവെന്നാണ് വിവരം. തമിഴ്നാടിന്റെ ഭാഗമായുള്ള അഗാധമായ കൊക്കയിലേക്കാണ് യുവാവ് പതിച്ചത്. കേരള ഫയർഫോഴ്സ് ഉദ്യോഗസ്ഥർ വടം കെട്ടി താഴ്ചയിലേക്ക് ഇറങ്ങി നടത്തിയ തിരച്ചിലിലാണ് മൃതദേഹം കണ്ടെത്തിയത്.
അതീവ ദുഷ്കരമായ സ്ഥലമായതിനാൽ മൃതദേഹം മുകളിലേക്ക് എത്തിക്കാനുള്ള നടപടികൾ പുരോഗമിക്കുകയാണ്. പ്രണയ നൈരാശ്യത്തെത്തുടർന്നുള്ള ആത്മഹത്യയാണിതെന്നാണ് പോലീസിന്റെ പ്രാഥമിക നിഗമനം. ചെന്നൈയിൽ നിന്നും വിനോദസഞ്ചാരത്തിനെത്തിയ സംഘത്തോടൊപ്പമാണ് ദ്രവിനീഷ് കൊളുക്കുമലയിൽ എത്തിയത്.
