ഡല്ഹി : ഓരോ പാര്ട്ടിക്കും തിരഞ്ഞെടുപ്പുബോണ്ടുകള് ആരില്നിന്നാണ് ലഭിച്ചതെന്ന് വ്യക്തമാക്കാന് അവയുടെ നമ്പറുകള്സഹിതം മുഴുവന് വിവരങ്ങളും പുറത്തുവിടാന് എസ്.ബി.ഐ.യോട് സുപ്രീംകോടതി ഉത്തരവിട്ടു. മുഴുവന് വിവരങ്ങളും നല്കിയതായി വ്യാഴാഴ്ച വൈകീട്ട് അഞ്ചിനകം എസ്.ബി.ഐ. ചെയര്മാന് സത്യവാങ്മൂലം ഫയല്ചെയ്യണം. എസ്.ബി.ഐ.യില്നിന്ന് വിവരങ്ങള് ലഭിച്ചാലുടന് തിരഞ്ഞെടുപ്പ് കമ്മിഷന് അത് വെബ്സൈറ്റില് പ്രസിദ്ധപ്പെടുത്തണമെന്നും ചീഫ് ജസ്റ്റിസ് ഡി.വൈ. ചന്ദ്രചൂഡ് അധ്യക്ഷനായ ഭരണഘടനാ ബെഞ്ച് ഉത്തരവിട്ടു. ബോണ്ടുകളുടെ നമ്പറുകള് തിരഞ്ഞെടുപ്പ് കമ്മിഷന് നല്കാത്ത എസ്.ബി.ഐ. നടപടിയെ ചീഫ് ജസ്റ്റിസ് രൂക്ഷമായി വിമര്ശിച്ചു. തീയതിയും തുകയും പേരുകളും ഉള്പ്പെടെ എല്ലാ വിവരങ്ങളും നല്കാനാണ് തങ്ങള് ആവശ്യപ്പെട്ടതെന്ന് സുപ്രീംകോടതി പറഞ്ഞു.
ഉള്പ്പെടെ എന്നുവെച്ചാല്, എല്ലാ വിവരങ്ങളും അതില്വരുമെന്നും ചീഫ് ജസ്റ്റിസ് വ്യക്തമാക്കി.ബോണ്ട് നമ്പറുകള് സഹിതം എല്ലാ വിവരങ്ങളും നല്കാന് പ്രയാസമില്ലെന്ന് എസ്.ബി.ഐ.ക്കുവേണ്ടി ഹാജരായ മുതിര്ന്ന അഭിഭാഷകന് ഹരീഷ് സാല്വെ അറിയിച്ചു. ഫെബ്രുവരി 15-ന്റെ ഉത്തരവില്നിന്ന് തങ്ങള്ക്ക് ബോധ്യമായതാണ് വെളിപ്പെടുത്തിയതെന്നും അദ്ദേഹം പറഞ്ഞു. ബോണ്ടുകളിലെ ആല്ഫാന്യൂമെറിക് നമ്പറും സീരിയല് നമ്പറുണ്ടെങ്കില് അതും നല്കാന് സുപ്രീംകോടതി നിര്ദേശിക്കുകയും ചെയ്തു. നേരത്തേ ബോണ്ട് പദ്ധതി റദ്ദാക്കിക്കൊണ്ടുള്ള ഉത്തരവില് സുപ്രീംകോടതി ആവശ്യപ്പെട്ടപ്രകാരം ദാതാക്കളുടെയും സ്വീകരിച്ച പാര്ട്ടികളുടെയും പേരുവിവരങ്ങളും തീയതിയും തുകയും മാത്രമാണ് എസ്.ബി.ഐ. നല്കിയിരുന്നത്.
