കൊച്ചി: സിപിഎം നേതാവ് പി.കെ.ശ്രീമതിയെയും കുടുംബത്തെയും അപകീര്ത്തിപ്പെടുത്തിയെന്ന കേസിൽ പരസ്യമായി ഖേദം പ്രകടിപ്പിച്ച് ബിജെപി നേതാവ് ബി.ഗോപാലകൃഷ്ണന്. അപകീര്ത്തി കേസില് ഹൈക്കോടതിയില് ഹാജരായ ശേഷമാണ് ഖേദപ്രകടനം. 2018 ജനുവരി 25ന് ചാനല് ചര്ച്ചയിലൂടെ അപകീര്ത്തിപ്പെടുത്തിയെന്നായിരുന്നു പരാതി. പി.കെ.ശ്രീമതി ആരോഗ്യ മന്ത്രിയായിരിക്കെ, മകന്റെ കമ്പനിയില് നിന്നും ആരോഗ്യ വകുപ്പ് മരുന്നുകള് വാങ്ങി എന്നായിരുന്നു ബിജെപി നേതാവ് ബി. ഗോപാലകൃഷ്ണന്റെ ആരോപണം.
ഉന്നയിച്ച ആരോപണം തെളിയിക്കാന് തന്റെ കൈവശം തെളിവോ രേഖകളോ ഇല്ലെന്ന് ഗോപാലകൃഷ്ണൻ പറഞ്ഞു. മകനെതിരെ വന്നത് വ്യാജ ആരോപണമാണെന്നും വസ്തുതകൾ മനസിലാക്കാതെ വ്യക്തിപരമായി ചാനൽ ചർച്ചകളിൽ നടത്തുന്ന അധിക്ഷേപങ്ങൾ ഭൂഷണമല്ലെന്നും പി.കെ ശ്രീമതി പറഞ്ഞു. നിയമ നടപടികൾ അവസാനിച്ചതായും ശ്രീമതി അറിയിച്ചു.
